<p>" ಈ ವಸ್ತು ನಿಮ್ಮ ಅಡುಗೆ ಮನೆಯ ಶೋಭೆ ಹೆಚ್ಚಿಸುತ್ತದೆ!"" ಇಲ್ಲಿ ಬನ್ನಿ, ಹಾ , ಹೀಗೆಯೇ ಬನ್ನಿ. ಎಂದಾದರೂ ಇಷ್ಟು ಸಣ್ಣ ಓಣಿಯಲ್ಲಿ ಹೆಜ್ಜೆ ಇರಿಸಿದ್ದೀರಾ? ಇಲ್ಲಿ ಮಾಡುವ ಇಡ್ಲಿ, ವಡೆ, ದೋಸೆಯ ರುಚಿ ಕಂಡಿದ್ದೀರಾ?" ಇವೆಲ್ಲವೂ ಪರಿಚಿತ ಎನಿಸುತ್ತಿದೆ ಅಲ್ಲವೆ?</p><p>ಇತ್ತೀಚಿನ ದಿನಗಳಲ್ಲಿ ಸಾಮಾಜಿಕ ಮಾಧ್ಯಮದ ಪ್ರಭಾವ ಅತಿಯಾಗಿ ಹೆಚ್ಚಾಗಿದೆ. ನಮ್ಮ ದಿನನಿತ್ಯದ ಬದುಕಿನ ಪ್ರಮುಖ ಭಾಗವಾಗಿ ಫೇಸ್‌ಬುಕ್, ಇನ್‌ಸ್ಟಾಗ್ರಾಂ, ಯುಟ್ಯೂಬ್ ಮುಂತಾದ ಪ್ಲಾಟ್‌ಫಾರ್ಮ್‌ಗಳು ಪರಿಣಮಿಸಿರುವುದನ್ನು ನಾವು ಕಾಣಬಹುದು. ಈ ಮಾಧ್ಯಮಗಳಲ್ಲಿ ಹೆಚ್ಚು ಗಮನ ಸೆಳೆಯುವವರು ಎಂದರೆ ಇನ್ಫ್ಲುಯೆನ್ಸರ್‌ಗಳು. ಇವರನ್ನು ಹತ್ತು ನೂರು ಸಾವಿರರು, ಕೆಲವೊಮ್ಮೆ ಲಕ್ಷಾಂತರ ಮಂದಿಯಷ್ಟು ಅನುಸರಿಸುತ್ತಾರೆ. ಆದರೆ ಈ ಇನ್ಫ್ಲುಯೆನ್ಸರ್‌ಗಳು ಪ್ರಭಾವಕ್ಕೆ ನಾವು ಅಗಾಧವಾಗಿ ಒಳಪಡುವುದರಿಂದ ಹಲವು ಸಮಸ್ಯೆಗಳು ಉಂಟಾಗಬಹುದು. ಆದ್ದರಿಂದ, ಇಂತಹ ಪ್ರಭಾವಿಗಳ ಬಗ್ಗೆ ಎಚ್ಚರಿಕೆಯಿಂದಿರುವುದು ಬಹುಮುಖ್ಯ.</p><p><strong>ಇನ್ಫ್ಲುಯೆನ್ಸರ್‌ಗಳು ಎಂದರೇನು?</strong>ಇನ್ಫ್ಲುಯೆನ್ಸರ್ ಎಂಬ ಪದವು "ಪ್ರಭಾವ ಬೀರುವವನು/ವಳು" ಎಂಬ ಅರ್ಥವನ್ನು ಹೊಂದಿದೆ. ಸಾಮಾಜಿಕ ಮಾಧ್ಯಮಗಳಲ್ಲಿ ತಮ್ಮ ಅಭಿಪ್ರಾಯ, ಜೀವನ ಶೈಲಿ, ಉಡುಗೆ ತೊಡುಗೆ, ಖಾದ್ಯ ಪದಾರ್ಥಗಳು, ಪ್ರವಾಸ, ಉತ್ಪನ್ನಗಳು ಇತ್ಯಾದಿಗಳನ್ನು ಜನರೊಂದಿಗೆ ಹಂಚಿಕೊಳ್ಳುವ ಮೂಲಕ ಅವರು ಜನರ ನಿಲುವು, ಅಭಿಪ್ರಾಯ ಮತ್ತು ಖರೀದಿ ನಿರ್ಧಾರಗಳ ಮೇಲೆ ಪ್ರಭಾವ ಬೀರುತ್ತಾರೆ. ಬಹುತೇಕ ಕಂಪನಿಗಳು ತಮ್ಮ ಉತ್ಪನ್ನಗಳು ಮತ್ತು ಸೇವೆಗಳ ಪ್ರಚಾರಕ್ಕಾಗಿ ಇಂತಹ ಜನರನ್ನು ಬಳಸಿಕೊಳ್ಳುತ್ತಿವೆ.</p><p><strong>ಮಾರ್ಕೆಟಿಂಗ್‌ನ ಹೊಸ ಯುಗ</strong>ಪೂರ್ವದಲ್ಲಿ ಜನರು ಜಾಹೀರಾತುಗಳನ್ನು ಟಿವಿ, ಪತ್ರಿಕೆಗಳಲ್ಲಿ ನೋಡುತ್ತಿದ್ದರು. ಆದರೆ ಈಗ ಅದು ಇನ್ಫ್ಲುಯೆನ್ಸರ್‌ಗಳ ಮುಖಾಂತರ ಸರಳವಾಗಿ ನಿಮ್ಮ ಮೊಬೈಲ್ ಫೋನ್‌ನಲ್ಲೇ ನುಗ್ಗುತ್ತಿದೆ. ಈ ಜನರು ತಮ್ಮ ಅನುಭವಗಳ ಬಗ್ಗೆ ಮಾತನಾಡುತ್ತಿರುವಂತಿರುತ್ತದಾದರೂ, ಅದು ಬಹುಪಾಲು ಪಾಲು ಪ್ರಚಾರವಾಗಿರುತ್ತದೆ. ಒಂದು ಮೊಬೈಲ್, ತ್ವಚೆಗೆ ಹಚ್ಚುವ ಲೋಶನ್, ಪೌಡರ್ ಅಥವಾ ಆಹಾರದ ಪ್ಯಾಕೆಟ್‌ಗೆ ಶಿಫಾರಸು ಮಾಡುತ್ತಿರುವ ಇನ್ಫ್ಲುಯೆನ್ಸರ್ ಅದರ ಕಂಪನಿಯಿಂದ ಹಣ ಪಡೆಯುತ್ತಿರುವ ಸಾಧ್ಯತೆ ಹೆಚ್ಚು. ಈ ಮಟ್ಟಿಗೆ ಬಂಡವಾಳದ ವ್ಯಾಪಾರ ಇಂದು ವ್ಯಕ್ತಿಗತ ಅಭಿಪ್ರಾಯದ ರೂಪದಲ್ಲೇ ಕಳವಳಕಾರಿಯಾಗಿ ಪರಿಣಮಿಸಿದೆ.</p><p><strong>ವಾಸ್ತವವಿಲ್ಲದ ಬದುಕಿನ ಪ್ರದರ್ಶನ</strong>ಇನ್ಫ್ಲುಯೆನ್ಸರ್‌ಗಳು ತಮ್ಮ ಸಾಮಾಜಿಕ ಮಾಧ್ಯಮ ಪುಟಗಳಲ್ಲಿ ತೋರಿಸುವುದು ಅತಿಯಾದ ಐಷಾರಾಮಿ ಜೀವನ, ಬೃಹತ್ ಮನೆಗಳು, ಐಷಾರಾಮಿ ಕಾರುಗಳು, ನವೀನ ವಸ್ತ್ರಗಳು, ದುಬಾರಿ ಆಹಾರಗಳು ಇತ್ಯಾದಿಗಳ ನಾಟಕ. ಅವರು ತೋರಿಸುತ್ತಿರುವುದು ಎಂದಿಗೂ ಅವರ ಸಂಪೂರ್ಣ ಜೀವನವಲ್ಲ, ಕೇವಲ ಫಿಲ್ಟರ್‌ಗೊಳಿಸಿದ, ಸಂಯೋಜಿತ ಭಾಗ. ಆದರೆ ಈ ಜೀವನವನ್ನು ನಾವು ಹೋಲಿಕೆ ಮಾಡುತ್ತಿದ್ದಾಗ ನಮ್ಮ ಬದುಕು ಅರ್ಥವಿಲ್ಲದಂತಾಗುತ್ತದೆ ಎಂಬ ಭಾವನೆ ಮೂಡಬಹುದು. ಇದರಿಂದ ಆತ್ಮವಿಶ್ವಾಸದ ಕೊರತೆ, ಹಿಂಜರಿಕೆ ಹಾಗೂ ಮಾನಸಿಕ ಒತ್ತಡ ಸಹ ಉಂಟಾಗಬಹುದು.</p><p><strong>ತಪ್ಪಾದ ಮಾಹಿತಿ ಮತ್ತು ತಪ್ಪು ನಿರ್ಧಾರಗಳು</strong>ಇನ್ಫ್ಲುಯೆನ್ಸರ್‌ಗಳು ಶಿಫಾರಸು ಮಾಡುವ ಎಲ್ಲವೂ ವೈಜ್ಞಾನಿಕವಾಗಿ ಸಮರ್ಥಿತವಾಗಿರುತ್ತದೆಯೇ ಎಂಬುದಿಲ್ಲ. ಕೆಲವೊಮ್ಮೆ ಆರೋಗ್ಯ ಸಂಬಂಧಿತ ಉತ್ಪನ್ನಗಳು, ತೂಕ ಇಳಿಕೆ ಗುಳಿಗೆಗಳು ಅಥವಾ ಕ್ರೀಂಗಳು ಪ್ರಚಾರಕ್ಕೆ ಒಳಪಡುವುದರಿಂದ, ದೋಷಪೂರ್ಣ ಮಾಹಿತಿ ಆಧಾರದ ಮೇಲೆ ಜನ ತೀರ್ಮಾನ ತೆಗೆದುಕೊಳ್ಳುತ್ತಾರೆ. ಇದು ಆರೋಗ್ಯಕ್ಕೆ ಹಾನಿಕಾರಿಯಾಗಬಹುದು. ಇತ್ತೀಚೆಗೆ ಹಲವಾರು ಸಂದರ್ಭಗಳಲ್ಲಿ ನಕಲಿ ಉತ್ಪನ್ನಗಳ ಪ್ರಚಾರ ಮಾಡುವುದರಿಂದ ಜನ ಹಣಕ್ಕೆ ಮತ್ತು ಆರೋಗ್ಯಕ್ಕೆ ನಷ್ಟ ಅನುಭವಿಸಿರುವುದೂ ಉಂಟು.</p><p><strong>ಬುದ್ಧಿವಂತ ಬಳಕೆದಾರರಾಗೋಣ</strong>ಇನ್ಫ್ಲುಯೆನ್ಸರ್‌ಗಳನ್ನೂ ಬೇರೆ ಯಾವುದೋ ಮಾಧ್ಯಮದಂತೆಯೇ ವಿಮರ್ಶಾತ್ಮಕವಾಗಿ ನೋಡಬೇಕು . ಅವರು ಪ್ರಚಾರ ಮಾಡುತ್ತಿರುವ ಉತ್ಪನ್ನ ನಮ್ಮ ಅಗತ್ಯವೋ? ನಮ್ಮ ಆರೋಗ್ಯಕ್ಕೆ ಸೂಕ್ತವೋ? ನಮ್ಮ ಆರ್ಥಿಕ ಸ್ಥಿತಿಗೆ ಹೊಂದಿಕೊಳ್ಳುತ್ತದೆಯೋ? ಎಂಬುದನ್ನು ಅಳೆಯಬೇಕು. ಪ್ಯಾಕಿಂಗ್ ಚೆನ್ನಾಗಿದೆಯೆಂದು ಅಥವಾ ಇನ್‌ಸ್ಟಾಗ್ರಾಂನಲ್ಲಿ ಹೆಚ್ಚು ಲೈಕ್ ಬಂದಿದೆ ಎಂಬ ಕಾರಣಕ್ಕೆ ನಾವು ಖರೀದಿ ಮಾಡಬಾರದು.</p><p><strong>ಹೊಸ ತಲೆಮಾರಿಗೆ ಬುದ್ಧಿವಾದ</strong>ವಿಶೇಷವಾಗಿ ಯುವ ತಲೆಮಾರಿಗೆ ಈ ಪ್ರಭಾವ ಹೆಚ್ಚು. ಶೀಘ್ರ ಯಶಸ್ಸು, ತಕ್ಷಣದ ಧನ ಸಂಪತ್ತು, ಜನಪ್ರಿಯತೆ ಎಂಬ ಆಸೆಗಳಿಂದ ಅವರು ಇನ್ಫ್ಲುಯೆನ್ಸರ್‌ಗಳ ನಡವಳಿಕೆಯನ್ನು ಅನುಕರಿಸುತ್ತಾರೆ. ಇದು ಅವರ ಗುರಿ ಮತ್ತು ವ್ಯಕ್ತಿತ್ವವನ್ನು ಹಾಳುಮಾಡಬಹುದು. ಶಾಲೆ ಕಾಲೇಜುಗಳಲ್ಲಿ ಸಾಮಾಜಿಕ ಮಾಧ್ಯಮ ಶಿಕ್ಷಣ, ಡಿಜಿಟಲ್ ಸನ್ನಿವೇಶದ ಬಗ್ಗೆ ಅರಿವು ಮೂಡಿಸುವ ತರಗತಿಗಳನ್ನು ನೀಡುವುದು ಅವಶ್ಯಕ.</p><p><strong>ಸುಜ್ಞಾನದ ಜೊತೆ ಮುಂದೆ ಸಾಗೋಣ</strong>ಇನ್ಫ್ಲುಯೆನ್ಸರ್‌ಗಳು ಹೊಸ ತಲೆಮಾರಿಗೆ ಪ್ರಭಾವ ಬೀರುತ್ತಿರುವ ಶಕ್ತಿಯವರು. ಅವರ ಪ್ರಭಾವದಿಂದ ಹೊಸ ಪ್ರಯತ್ನಗಳು, ತಿಳುವಳಿಕೆಯೂ ಬರುತ್ತದೆ. ಆದರೆ ಎಲ್ಲ ಮಾತುಗಳನ್ನೂ ನಂಬಿ ಅನುಸರಿಸುವ ಬದಲು, ನಮ್ಮ ಬುದ್ಧಿಯನ್ನು ಉಪಯೋಗಿಸಿ ತೀರ್ಮಾನ ಮಾಡುವ ಸಾಮರ್ಥ್ಯ ನಮ್ಮಲ್ಲಿರಬೇಕು. ಇನ್ಫ್ಲುಯೆನ್ಸರ್‌ಗಳು ನಮ್ಮ ಜೀವನ ರೂಪಿಸಬಾರದು – ಅವರು ಸೂಚಿಸುವ ದಾರಿಗಳಲ್ಲಿ ನಮ್ಮ ಸ್ವಂತ ದಾರಿಯನ್ನು ರೂಪಿಸೋಣ. ಮಾಹಿತಿ ಆಧಾರಿತ, ವಿಮರ್ಶಾತ್ಮಕ ಹಾಗೂ ಜವಾಬ್ದಾರಿಯುತ ನಿರ್ಧಾರಗಳೊಂದಿಗೆ ಸಾಮಾಜಿಕ ಮಾಧ್ಯಮದ ಪ್ರಭಾವವನ್ನು ಸಕಾರಾತ್ಮಕವಾಗಿ ಬಳಸಿ, ಒಳ್ಳೆಯ ಸಮಾಜ ನಿರ್ಮಾಣದತ್ತ ಹೆಜ್ಜೆ ಹಾಕೋಣ.</p><p><strong>-ಡಾ. ಸಹನಾ ಪ್ರಸಾದ್ </strong></p>
Source link
ಸೋಶಿಯಲ್ ಮೀಡಿಯಾದಲ್ಲಿ ಇನ್ಫ್ಲುಯೆನ್ಸರ್‌ಗಳು ಇದ್ದಾರೆ ಎಚ್ಚರ!
