ಮಾರ್ಚ್ 4 ರಂದು ಬೆಳಿಗ್ಗೆ ಕೆವಿಎನ್ ಸಂಸ್ಥೆ ಯಶ್ ಅಭಿಮಾನಿಗಳಿಗೆ ಬ್ಯಾಡ್ ನ್ಯೂಸ್ ನೀಡಿತು. ‘ಟಾಕ್ಸಿಕ್’ (ವಿಷಕಾರಿ) ಸಿನಿಮಾ ಮಾರ್ಚ್ 19ಕ್ಕೆ ತೆರೆಗೆ ಬರೋದು ಪಕ್ಕಾ ಎಂಬ ರೀತಿ ಬಿಂಬಿಸಲಾಯಿತು. ಆದರೆ, ಏಕಾಏಕಿ ಸಿನಿಮಾ ರಿಲೀಸ್ ದಿನಾಂಕವನ್ನು ತಂಡ ಮುಂದಕ್ಕೆ ಹಾಕಿದೆ. ಜೂನ್ 4ರಂದು ಸಿನಿಮಾ ರಿಲೀಸ್ ಮಾಡಲಾಗಿದೆ ಎಂದು ನಿರ್ಮಾಣ ಸಂಸ್ಥೆ ಹೇಳಿದೆ. ಹಾಗಾದರೆ ಬಾಕ್ಸ್ ಆಫೀಸ್ ನಲ್ಲಿ ಕೆವಿಎನ್ vs ಕೆವಿಎನ್ ಎಂಬ ಪರಿಸ್ಥಿತಿ ನಿರ್ಮಾಣ ಆಗಲಿದೆಯೇ ಎಂಬ ಪ್ರಶ್ನೆ ಮೂಡುವಂತೆ ಆಗಿದೆ. ಇದಕ್ಕೆ ಕಾರಣವೂ ಇದೆ.
ಕೆವಿಎನ್ ಸಂಸ್ಥೆ ಒಮ್ಮೆಲೇ ಮೂರು ದೊಡ್ಡ ಬಜೆಟ್ ಚಿತ್ರಗಳನ್ನು ಕೈಗೆತ್ತಿಕೊಂಡಿತು. ‘ಜನ ನಾಯಕನ್’ ಜನವರಿ 9ಕ್ಕೆ, ‘ಟಾಕ್ಸಿಕ್’ ಮಾರ್ಚ್ 19ಕ್ಕೆ ಹಾಗೂ ‘ಕೇಡಿ’ ಚಿತ್ರ ಏಪ್ರಿಲ್ 30ಕ್ಕೆ ರಿಲೀಸ್ ಮಾಡುವ ಪ್ಲ್ಯಾನ್ ತಂಡಕ್ಕೆ ಇತ್ತು. ಎಲ್ಲಾ ರಿಲೀಸ್ ಮಧ್ಯೆ 50+ ದಿನಗಳ ಅಂತರ ಇತ್ತು. ಆದರೆ, ಸದ್ಯದ ಪರಿಸ್ಥಿತಿಯಲ್ಲಿ ‘ಜನ ನಾಯಕನ್’ ಹಾಗೂ ‘ಟಾಕ್ಸಿಕ್’ ರಿಲೀಸ್ ಮುಂದಕ್ಕೆ ಹೋಗಿದೆ. ‘ಜನ ನಾಯಕನ್’ ಸೆನ್ಸಾರ್ ಪ್ರಕ್ರಿಯೆ ಆಗಿಲ್ಲ. ಈ ಕಾರಣದಿಂದ ಈ ಸಿನಿಮಾ ರಿಲೀಸ್ ಬಗ್ಗೆ ಸ್ಪಷ್ಟನೆ ಸಿಕ್ಕಿಲ್ಲ. ‘ಟಾಕ್ಸಿಕ್’ ಜೂನ್ 4ಕ್ಕೆ ಬರೋದಾಗಿ ಘೋಷಣೆಯಾಗಿದೆ.
ಈ ಮೊದಲು ಹರಿದಾಡಿದ ಮಾಹಿತಿ ಪ್ರಕಾರ, ‘ಜನ ನಾಯಕನ್’ ಸಿನಿಮಾ ಜೂನ್ ಅಲ್ಲಿ ತೆರೆಗೆ ಬರಲಿದೆ ಎನ್ನಲಾಗುತ್ತದೆ. ಜೂನ್ 22 ವಿಜಯ್ ಜನ್ಮದಿನ. ಈ ವಿಶೇಷ ದಿನದ ಸಮಯದಲ್ಲಿ ‘ಜನ ನಾಯಕನ’ ಆಲೋಚನೆ ತಂಡಕ್ಕೆ ಇದೆ. ಈಗ ‘ಟಾಕ್ಸಿಕ್’ ಕೂಡ ಜೂನ್ ಅಲ್ಲೇ ಬರುತ್ತಿದೆ. ಹೀಗಾಗಿ, ಒಂದೇ ನಿರ್ಮಾಣ ಸಂಸ್ಥೆಯ ಎರಡು ಚಿತ್ರಗಳು ಒಂದೇ ತಿಂಗಳಲ್ಲಿ ಬಿಡುಗಡೆ ಆಗಲಿದೆಯೇ ಎಂಬ ಪ್ರಶ್ನೆ ಅಭಿಮಾನಿಗಳದ್ದು. ಹಾಗಾದಾಗ, ಕೆವಿಎನ್ ವಿರುದ್ಧ ಕೆವಿಎನ್ ಎಂಬತಹ ಸ್ಥಿತಿ ನಿರ್ಮಾಣವಾಗುತ್ತದೆ.
ಇದನ್ನೂ ಓದಿ: ಕೊನೆ ಕ್ಷಣದಲ್ಲಿ ಅಭಿಮಾನಿಗಳಿಗೆ ಶಾಕ್ ಕೊಟ್ಟ ಯಶ್; ಟಾಕ್ಸಿಕ್ ಸಿನಿಮಾ ರಿಲೀಸ್ ಮುಂದಕ್ಕೆ
ಯಾವುದೇ ಪಳಗಿದ ನಿರ್ಮಾಪಕರು ನಿರ್ಮಾಣ ಸಂಸ್ಥೆಯ ಎರಡು ಸಿನಿಮಾಗಳನ್ನು ಒಂದೇ ತಿಂಗಳಲ್ಲಿ ರಿಲೀಸ್ ಮಾಡುವ ಸಾಹಸಕ್ಕೆ ಹೊಗೋದಿಲ್ಲ. ಅದರಲ್ಲೂ ಬಿಗ್ ಬಜೆಟ್ ಸಿನಿಮಾ ಎಂದಾಗ ಆ ರೀತಿಯ ಸಾಹಸವನ್ನು ಮಾಡೋದಿಲ್ಲ. ಹೀಗಾಗಿ, ಕೆವಿಎನ್ ಕೂಡ ಈ ಬಗ್ಗೆ ಬೇರೆಯದೇ ರೀತಿಯ ಸ್ಟ್ರೆಟಜಿ ಮಾಡಬಹುದು ಎಂದು ಹೇಳಲಾಗುವುದಿಲ್ಲ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
