ಹುಟ್ಟುಹಬ್ಬದ ಗಿಫ್ಟ್: ಟೀಂ ಇಂಡಿಯಾ ಎಂಟ್ರಿಗೆ ವೈಭವ್‌ ಸೂರ್ಯವಂಶಿಗೆ ಗ್ರೀನ್ ಸಿಗ್ನಲ್!

ಐಪಿಎಲ್ 2026 ಆರಂಭಕ್ಕೂ ಒಂದು ದಿನ ಮುನ್ನ, ಯುವ ಕ್ರಿಕೆಟ್ ಸೆನ್ಸೇಷನ್ ವೈಭವ್ ಸೂರ್ಯವಂಶಿ ಅವರಿಗೆ ಐಸಿಸಿ ನಿಯಮಗಳಿಂದ ಮುಕ್ತಿ ಸಿಕ್ಕಿದೆ. 15 ವರ್ಷ ಪೂರೈಸಿದ ಅವರು ಈಗ ಟೀಂ ಇಂಡಿಯಾ ಆಯ್ಕೆಗೆ ಅರ್ಹರಾಗಿದ್ದಾರೆ.<img>ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲಿ ಚಿಕ್ಕ ವಯಸ್ಸಿನಲ್ಲೇ ಸಂಚಲನ ಸೃಷ್ಟಿಸುತ್ತಿರುವ ಯುವ ಆಟಗಾರ ವೈಭವ್ ಸೂರ್ಯವಂಶಿ ಪಾಲಿಗೆ ಮಾರ್ಚ್ 27, 2026 ಒಂದು ಮರೆಯಲಾಗದ ದಿನ. ಐಪಿಎಲ್ 19ನೇ ಸೀಸನ್ (IPL 2026) ಆರಂಭಕ್ಕೂ ಸರಿಯಾಗಿ ಒಂದು ದಿನ ಮುನ್ನ ವೈಭವ್ ತಮ್ಮ 15ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳುತ್ತಿದ್ದಾರೆ. ಈ ಹುಟ್ಟುಹಬ್ಬ ಕೇವಲ ಸಂಭ್ರಮ ಮಾತ್ರವಲ್ಲ, ಅವರ ವೃತ್ತಿಜೀವನದಲ್ಲಿ ಒಂದು ದೊಡ್ಡ ತಿರುವು ತಂದಿದೆ. 15 ವರ್ಷ ಪೂರ್ಣಗೊಳಿಸಿದ ಕಾರಣ, ವೈಭವ್ ಈಗ ಭಾರತದ ಸೀನಿಯರ್ ತಂಡಕ್ಕೆ ಆಯ್ಕೆಯಾಗಲು ಅಧಿಕೃತವಾಗಿ ಅರ್ಹತೆ ಪಡೆದಿದ್ದಾರೆ. ಇಷ್ಟು ದಿನ ಅವರ ಆಯ್ಕೆಗೆ ಅಡ್ಡಿಯಾಗಿದ್ದ ಐಸಿಸಿ ವಯೋಮಿತಿ ನಿಯಮ ಈಗ ದೂರವಾಗಿದೆ.<img>ಕಳೆದ ವರ್ಷ ಐಪಿಎಲ್ 2025ರಲ್ಲಿ ವೈಭವ್ ಸೂರ್ಯವಂಶಿ ಅದ್ಭುತ ಪ್ರದರ್ಶನ ನೀಡಿದರೂ, ಟೀಂ ಇಂಡಿಯಾ ಆಯ್ಕೆಗಾರರು ಅವರನ್ನು ಸೀನಿಯರ್ ತಂಡಕ್ಕೆ ಪರಿಗಣಿಸಲು ಸಾಧ್ಯವಾಗಿರಲಿಲ್ಲ. ಇದಕ್ಕೆ ಮುಖ್ಯ ಕಾರಣ, ಐಸಿಸಿ (ICC) 2020ರ ನವೆಂಬರ್‌ನಲ್ಲಿ ಜಾರಿಗೆ ತಂದಿದ್ದ ಒಂದು ನಿಯಮ. ಅಂತರಾಷ್ಟ್ರೀಯ ಕ್ರಿಕೆಟ್ (ಪುರುಷರು, ಮಹಿಳೆಯರು ಅಥವಾ ಅಂಡರ್-19) ಆಡುವ ಯಾವುದೇ ಆಟಗಾರನಿಗೆ ಕನಿಷ್ಠ 15 ವರ್ಷ ವಯಸ್ಸಾಗಿರಬೇಕು ಎಂದು ಐಸಿಸಿ ಸ್ಪಷ್ಟಪಡಿಸಿದೆ. ಆಟಗಾರರ ಸುರಕ್ಷತೆ ಮತ್ತು ಹಿತದೃಷ್ಟಿಯಿಂದ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ನಿನ್ನೆಯವರೆಗೂ ವೈಭವ್‌ಗೆ 14 ವರ್ಷ ಆಗಿದ್ದರಿಂದ, ಅವರ ಆಟ ಎಷ್ಟೇ ಅದ್ಭುತವಾಗಿದ್ದರೂ ಭಾರತ ತಂಡದ ಬಾಗಿಲು ತಟ್ಟಲು ಸಾಧ್ಯವಾಗಿರಲಿಲ್ಲ. ಆದರೆ ಇಂದು 15ನೇ ವಸಂತಕ್ಕೆ ಕಾಲಿಟ್ಟಿದ್ದರಿಂದ ಆ ಅಡ್ಡಿ ನಿವಾರಣೆಯಾಗಿದೆ.<img><p>ಬಿಹಾರ ಮೂಲದ ಈ ಎಡಗೈ ಬ್ಯಾಟರ್, ಐಪಿಎಲ್ 2025ರಲ್ಲಿ ರಾಜಸ್ಥಾನ ರಾಯಲ್ಸ್ ಪರ ಆಡಿ ಇಡೀ ಕ್ರಿಕೆಟ್ ಜಗತ್ತಿನ ಗಮನ ಸೆಳೆದಿದ್ದರು. ಕೇವಲ 14ನೇ ವಯಸ್ಸಿನಲ್ಲಿ ಪದಾರ್ಪಣೆ ಮಾಡಿದ ವೈಭವ್, ತಮ್ಮ ಮೊದಲ ಪಂದ್ಯದಲ್ಲೇ ಎದುರಿಸಿದ ಮೊದಲ ಎಸೆತಕ್ಕೆ ಸಿಕ್ಸರ್ ಬಾರಿಸಿ ತಮ್ಮ ಗುರಿಯನ್ನು ಸ್ಪಷ್ಟಪಡಿಸಿದ್ದರು. ಗುಜರಾತ್ ಟೈಟಾನ್ಸ್ ವಿರುದ್ಧದ ಪಂದ್ಯದಲ್ಲಿ ಕೇವಲ 35 ಎಸೆತಗಳಲ್ಲಿ ಶತಕ ಸಿಡಿಸಿ ಕ್ರಿಕೆಟ್ ಲೋಕವನ್ನೇ ಬೆರಗುಗೊಳಿಸಿದ್ದರು. ಇದು ಐಪಿಎಲ್ ಇತಿಹಾಸದಲ್ಲೇ ಎರಡನೇ ವೇಗದ ಶತಕವಾಗಿ ದಾಖಲಾಗಿದೆ. ಅತಿ ಕಿರಿಯ ವಯಸ್ಸಿನಲ್ಲಿ ಶತಕ ಬಾರಿಸಿದ ಆಟಗಾರ ಎಂಬ ಇತಿಹಾಸವನ್ನೂ ಅವರು ಸೃಷ್ಟಿಸಿದರು.</p><img><p>ವೈಭವ್ ಐಪಿಎಲ್ 2025ರ ಸೀಸನ್‌ನಲ್ಲಿ ಕೇವಲ 7 ಪಂದ್ಯಗಳನ್ನು ಆಡಿ 206.55 ಸ್ಟ್ರೈಕ್ ರೇಟ್‌ನಲ್ಲಿ 252 ರನ್ ಗಳಿಸಿದ್ದರು. ಇದರಲ್ಲಿ ಒಂದು ಶತಕ ಮತ್ತು ಒಂದು ಅರ್ಧಶತಕ ಸೇರಿದೆ. ಐಪಿಎಲ್ ನಂತರವೂ ತಮ್ಮ ಬಿರುಸಿನ ಆಟ ಮುಂದುವರಿಸಿದರು. ಭಾರತದ ಅಂಡರ್-19 ತಂಡದ ಪರ ಆಡಿ ರನ್‌ಗಳ ಹೊಳೆ ಹರಿಸಿದರು. ಇಲ್ಲಿಯವರೆಗಿನ ವೈಭವ್ ಅವರ ವೃತ್ತಿಜೀವನದ ಅಂಕಿಅಂಶಗಳನ್ನು ನೋಡಿದರೆ:&nbsp;</p><p>• ಟಿ20 ಕ್ರಿಕೆಟ್: 18 ಪಂದ್ಯಗಳಲ್ಲಿ 701 ರನ್ (3 ಶತಕಗಳು).&nbsp;</p><p>• ಲಿಸ್ಟ್ ಎ (ಏಕದಿನ): 8 ಪಂದ್ಯಗಳಲ್ಲಿ 353 ರನ್ (1 ಶತಕ).&nbsp;</p><p>• ಪ್ರಥಮ ದರ್ಜೆ: 8 ಪಂದ್ಯಗಳಲ್ಲಿ 207 ರನ್.&nbsp;</p><p>ಯಾವ ಫಾರ್ಮ್ಯಾಟ್‌ನಲ್ಲೇ ಆಡಿದರೂ, ಭರ್ಜರಿ ಹಿಟ್ಟಿಂಗ್ ಮೂಲಕ ಎದುರಾಳಿ ಬೌಲರ್‌ಗಳಿಗೆ ಬೆವರಿಳಿಸುವುದು ವೈಭವ್ ಅವರ ಶೈಲಿ.</p><img><p>ಮಾರ್ಚ್ 28 ರಿಂದ ಐಪಿಎಲ್ 2026 ಆರಂಭವಾಗಲಿದೆ. ಮೊದಲ ಪಂದ್ಯದಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡಗಳು ಮುಖಾಮುಖಿಯಾಗಲಿವೆ. ಈ ಸೀಸನ್‌ನಲ್ಲೂ ವೈಭವ್ ತಮ್ಮ ಬ್ಯಾಟ್‌ನಿಂದ ಅಬ್ಬರಿಸಲು ಸಜ್ಜಾಗಿದ್ದಾರೆ. ಈಗ ವಯಸ್ಸಿನ ಅಡ್ಡಿ ದೂರವಾಗಿರುವುದರಿಂದ, ಈ ಐಪಿಎಲ್‌ನಲ್ಲಿ ಅವರು ಮಿಂಚಿದರೆ ನೇರವಾಗಿ ಟೀಂ ಇಂಡಿಯಾದ ನೀಲಿ ಜರ್ಸಿ ಧರಿಸುವ ಅವಕಾಶವಿದೆ.&nbsp;</p><img><p>ಆಯ್ಕೆಗಾರರು ಗ್ರೀನ್ ಸಿಗ್ನಲ್ ನೀಡಿದರೆ, ಯಾವುದೇ ಕ್ಷಣದಲ್ಲಿ ವೈಭವ್ ಭಾರತದ ಸೀನಿಯರ್ ತಂಡಕ್ಕೆ ಎಂಟ್ರಿ ಕೊಡಬಹುದು. ಭಾರತೀಯ ಕ್ರಿಕೆಟ್‌ನಲ್ಲಿ ಮತ್ತೊಂದು ಸಂಚಲನಕಾರಿ ಯುಗ ಆರಂಭವಾದಂತೆಯೇ ಸರಿ ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.</p>



Source link