ಏಪ್ರಿಲ್ 1 ರಿಂದ, ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು (NHAI) ಹಲವು ಪ್ರಮುಖ ಹೆದ್ದಾರಿಗಳಲ್ಲಿ ಟೋಲ್ ಶುಲ್ಕವನ್ನು ಹೆಚ್ಚಿಸಿದೆ. ಈ ದರ ಏರಿಕೆಯು ಕಾರು, ಬಸ್, ಮತ್ತು ಲಘು ವಾಣಿಜ್ಯ ವಾಹನಗಳ ಮೇಲೆ ಪರಿಣಾಮ ಬೀರಲಿದ್ದು, ಪ್ರಯಾಣಿಕರ ಜೇಬಿಗೆ ಹೊರೆಯಾಗಲಿದೆ.
ಹೆದ್ದಾರಿ ಟೋಲ್ ದರ ಹೆಚ್ಚಿಸಿದ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ
ಉಡುಪಿ/ಕೊಪ್ಪಳ/ ನವದೆಹಲಿ: ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI) ಏಪ್ರಿಲ್ 1 ರಿಂದ ಅಂದರೆ ಇಂದಿನಿಂದ ಜಾರಿಗೆ ಬರುವಂತೆ ಪ್ರಮುಖ ಕಾರಿಡಾರ್ಗಳಲ್ಲಿ ಟೋಲ್ ಶುಲ್ಕವನ್ನು ಹೆಚ್ಚಿಸಿದೆ. ಈ ಪರಿಷ್ಕೃತ ಪದರಗಳು ಬೆಂಗಳೂರು-ಚೆನ್ನೈ ಎಕ್ಸ್ಪ್ರೆಸ್ವೇ (ಕರ್ನಾಟಕದೊಳಗೆ ಹೊಸಕೋಟೆ-ಕೆಜಿಎಫ್ ಮಾರ್ಗ), ದಾಬಸ್ಪೇಟೆ ಮತ್ತು ಹೊಸಕೋಟೆ ನಡುವಿನ ಸ್ಯಾಟಲೈಟ್ ಟೌನ್ ರಿಂಗ್ ರಸ್ತೆ (ಎಸ್ಟಿಆರ್ಆರ್), ಬೆಂಗಳೂರು-ಮೈಸೂರು ಪ್ರವೇಶ ನಿಯಂತ್ರಿತ ಹೆದ್ದಾರಿ, ಕನಕಪುರ ರಸ್ತೆ, ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ (ಕೆಐಎ) ಹೋಗುವ ಬಳ್ಳಾರಿ ರಸ್ತೆ ಮತ್ತು ಇತರ ರಾಷ್ಟ್ರೀಯ ಹೆದ್ದಾರಿಗಳಿಗೆ ಅನ್ವಯಿಸುತ್ತವೆ.
ಹೆದ್ದಾರಿ ಪ್ರಯಾಣ ಇನ್ನೂ ದುಬಾರಿ
ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ ರಸ್ತೆ (ಬಳ್ಳಾರಿ ರಸ್ತೆ) ದಲ್ಲಿರುವ ಸಾದಹಳ್ಳಿ ಟೋಲ್ ಗೇಟ್ನಲ್ಲಿ, ಕಾರುಗಳಿಗೆ ಒಂದೇ ಪ್ರಯಾಣದ ಶುಲ್ಕ 120 ರೂ.ನಲ್ಲಿ ಯಾವುದೇ ಬದಲಾವಣೆ ಆಗದೇ ಉಳಿದಿದೆ, ಆದರೆ ಹಿಂತಿರುಗುವ ಪ್ರಯಾಣ ಶುಲ್ಕವನ್ನು 180 ರೂ.ಗಳಿಂದ 185 ರೂ.ಗಳಿಗೆ ಹೆಚ್ಚಿಸಲಾಗಿದೆ. ಹಾಗೆಯೇ 50 ಟ್ರಿಪ್ಗಳಿಗೆ ಮಾಸಿಕ ಪಾಸ್ ಈಗ 4,070 ರೂಗೆ ಏರಿಕೆ ಆಗಿದೆ.
ಯಾವ ವಾಹನಗಳಿಗೆ ಎಷ್ಟೆಷ್ಟು ದರ ಹೆಚ್ಚಳ
ಲಘು ವಾಣಿಜ್ಯ ವಾಹನಗಳು (LCV/LGV) ಮತ್ತು ಮಿನಿ ಬಸ್ಗಳ ಟೋಲ್ ಶುಲ್ಕ 5 ರೂ. ಏರಿಕೆಯಾಗಿದ್ದು, ಸಿಂಗಲ್ ಟ್ರಿಪ್ ಶುಲ್ಕ 185 ರೂ.ಗಳಿಂದ 190 ರೂ.ಗಳಿಗೆ ಮತ್ತು ಹಿಂತಿರುಗುವ ದರ 275 ರೂ.ಗಳಿಂದ 280 ರೂ.ಗಳಿಗೆ ಏರಿಕೆಯಾಗಿದೆ. ಮಾಸಿಕ ಪಾಸ್ಗಳ ದರ 6,255 ರೂ ಆಗಿದೆ. ಹಾಗೆಯೇ ಟ್ರಕ್ ಮತ್ತು ಬಸ್ ನಿರ್ವಾಹಕರಿಗೆ 5 ರಿಂದ 15 ರೂ. ಹೆಚ್ಚಳದ ಹೊರೆ ಬೀಳಲಿದೆ. ಸಿಂಗಲ್ ಟ್ರಿಪ್ ಶುಲ್ಕವನ್ನು 375 ರೂ.ಗೆ ಪರಿಷ್ಕರಿಸಲಾಗಿದೆ. ಆದರೆ ಹಿಂತಿರುಗುವ ಪ್ರಯಾಣಕ್ಕೆ ಈಗ 565 ರೂ. ವೆಚ್ಚವಾಗಲಿದೆ. ಮಾಸಿಕ ಪಾಸ್ 12,575 ರೂಗೆ ಸಿಗಲಿದೆ.
ಈ ಹೆಚ್ಚಳವು ಬಸ್ ದರಗಳ ಮೇಲೆ ವಿಶೇಷವಾಗಿ ವಿಮಾನ ನಿಲ್ದಾಣ ಮತ್ತು ದೇವನಹಳ್ಳಿ ಮತ್ತು ಚಿಕ್ಕಬಳ್ಳಾಪುರದಂತಹ ಸುತ್ತಮುತ್ತಲಿನ ಪಟ್ಟಣಗಳಿಗೆ ಸಂಚರಿಸುವ ಬಿಎಂಟಿಸಿ ನಿರ್ವಹಿಸುವ ಸೇವೆಗಳ ಮೇಲೆ ತೀವ್ರ ಪರಿಣಾಮ ಬೀರುವ ಸಾಧ್ಯತೆಯಿದೆ. ವಿಮಾನ ಪ್ರಯಾಣಿಕರು ವಾಯು ವಜ್ರ ಸೇವೆಗಳಿಗೆ ಹೆಚ್ಚಿನ ಹಣ ಪಾವತಿಸಬೇಕಾಗಬಹುದು.
ಇದನ್ನೂ ಓದಿ: ಕಾಮಕ್ಯ ದೇಗುಲದ ಪುರೋಹಿತರ ಮಾತು ನಿಜವಾಯ್ತು: ಕೊಲೆ ನಡೆದು ಸರಿಯಾಗಿ 9 ತಿಂಗಳ ನಂತರ ರಾಜ ರಘುವಂಶಿ ಮನೆಗೆ ಹೊಸ ಸದಸ್ಯನ ಆಗಮನ
ಎಸ್ಟಿಆರ್ಆರ್ ಕಾರಿಡಾರ್ನಲ್ಲಿ ಕಾರುಗಳ ಟೋಲ್ ಅನ್ನು 5 ರೂ. ಹೆಚ್ಚಿಸಲಾಗಿದೆ. ನೆಲ್ಲೂರು-ದೇವನಹಳ್ಳಿ ಪ್ಲಾಜಾದಲ್ಲಿ ಸಿಂಗಲ್ ಟ್ರಿಪ್ಶುಲ್ಕ 75 ರೂ, ಹಿಂತಿರುಗುವ ಪ್ರಯಾಣಕ್ಕೆ 125 ರೂ. ಮತ್ತು ಮಾಸಿಕ ಪಾಸ್ಗೆ 2,805 ರೂ. ನಿಗದಿಯಾಗಿದೆ.. ಹುಲಿಕುಂಟೆಯಲ್ಲಿ ಕಾರುಗಳು ಒಂದೇ ಟ್ರಿಪ್ಗೆ 110 ರೂ. ಮತ್ತು ಹಿಂತಿರುಗುವ ಪ್ರಯಾಣಕ್ಕೆ 160 ರೂ. ಮಾಸಿಕ ಪಾಸ್ಗಳ ಬೆಲೆ 3,595 ರೂ. ಆಗಿದೆ
ಬೆಂಗಳೂರು-ಚೆನ್ನೈ ಎಕ್ಸ್ಪ್ರೆಸ್ವೇಯ ಹೊಸಕೋಟೆ ಮತ್ತು ಕೆಜಿಎಫ್ (ಬೇತಮಂಗಲ) ನಡುವಿನ 72 ಕಿ.ಮೀ ಕಾರ್ಯಾಚರಣೆಯ ಪ್ರದೇಶದಲ್ಲಿ ಎನ್ಎಚ್ಎಐ ಟೋಲ್ ಶುಲ್ಕವನ್ನು ಪರಿಷ್ಕರಿಸಿದೆ. ಹೆಡಗಿನಬೆಲೆ, ಅಗ್ರಹಾರ, ಕೃಷ್ಣಾಪುರ ಮತ್ತು ಸುಂದರಪಾಳ್ಯ ಎಂಬ ನಾಲ್ಕು ಟೋಲ್ ಪ್ಲಾಜಾಗಳಲ್ಲಿ ಕಾರು ಬಳಕೆದಾರರು ಒಂದೇ ಟ್ರಿಪ್ಗೆ ಸುಮಾರು 150 ರೂ. ಮತ್ತು ಹಿಂತಿರುಗುವ ಪ್ರಯಾಣಕ್ಕೆ 225 ರೂ. ವರೆಗೆ ಪಾವತಿಸಬೇಕಾಗುತ್ತದೆ ಇಲ್ಲಿ ಮಾಸಿಕ ಪಾಸ್ಗಳ ದರ 4,860 ರಿಂದ 4,985 ರೂ.ಗಳವರೆಗೆ ಇದೆ.
ಇದನ್ನೂ ಓದಿ: ಫೋಟೋಶೂಟ್ಗಾಗಿ ಬಣ್ಣ ಬಳಿದ ನಾಲ್ಕೇ ತಿಂಗಳಿಗೆ ಆನೆ ಚಂಚಲ್ ಸಾವು: ಬಣ್ಣ ಹಾಕಿದ್ದಕ್ಕೆ ಪ್ರಾಣಿಪ್ರಿಯರ ತೀವ್ರ ಆಕ್ರೋಶ
ಈ ಪ್ರದೇಶದ ಟೋಲ್ ದರಗಳಲ್ಲಿ ಗಮನಾರ್ಹ ಏರಿಕೆ ಕಂಡು ಬಂದಿದೆ.. ಕಳೆದ ವರ್ಷ ಎಕ್ಸ್ಪ್ರೆಸ್ವೇ ಪ್ರಾರಂಭವಾದಾಗ ಆರಂಭದಲ್ಲಿ ಎಕ್ಸ್ಪ್ರೆಸ್ವೇ ಮಟ್ಟದ ಟೋಲ್ಗಳನ್ನು ವಿಧಿಸಿದ ನಂತರ, ಇನ್ನೂ ಪೂರ್ಣಗೊಳ್ಳದ ವಿಭಾಗಗಳನ್ನು ಉಲ್ಲೇಖಿಸಿ ಫೆಬ್ರವರಿ 2026 ರಲ್ಲಿ ಹೆದ್ದಾರಿ ಪ್ರಾಧಿಕಾರ ದರಗಳನ್ನು ಕಡಿಮೆ ಮಾಡಿತು. 261 ಕಿ.ಮೀ ಕಾರಿಡಾರ್ನಲ್ಲಿ ಕೇವಲ 72 ಕಿ.ಮೀ ಮಾತ್ರ ಕಾರ್ಯನಿರ್ವಹಿಸುತ್ತಿರುವುದರಿಂದ, ಪ್ರಾಧಿಕಾರವು ಈಗ ಪೂರ್ಣ ಎಕ್ಸ್ಪ್ರೆಸ್ವೇ ಬೆಲೆ ನಿಗದಿಗಿಂತ ಎನ್ಹೆಚ್ ದರಗಳಿಗೆ ಸಮಾನವಾಗಿ ಟೋಲ್ಗಳನ್ನು ವಿಧಿಸುತ್ತಿದೆ.
ಬೆಂಗಳೂರು-ಮೈಸೂರು ಪ್ರವೇಶ ನಿಯಂತ್ರಿತ ಹೆದ್ದಾರಿಯಲ್ಲಿ ಕಾರುಗಳ ಟೋಲ್ ಅನ್ನು 5 ರೂ. ಹೆಚ್ಚಿಸಲಾಗಿದೆ. ಕಣಿಮಿಣಿಕೆಯಲ್ಲಿ ಒಂದೇ ಪ್ರಯಾಣದ ಟೋಲ್ ಅನ್ನು 175 ರೂ.ಗಳಿಂದ 180 ರೂ.ಗಳಿಗೆ ಪರಿಷ್ಕರಿಸಲಾಗಿದೆ, ಆದರೆ ಹಿಂತಿರುಗುವ ಪ್ರಯಾಣ ಶುಲ್ಕವನ್ನು 260 ರೂ.ಗಳಿಂದ 265 ರೂ.ಗಳಿಗೆ ಹೆಚ್ಚಿಸಲಾಗಿದೆ.
ಗಾಣಗುರು ಟೋಲ್ ಪ್ಲಾಜಾದಲ್ಲಿ, ಏಕ-ಪ್ರಯಾಣದ ಶುಲ್ಕ 170 ರೂ.ಗಳಿಂದ 175 ರೂ.ಗಳಿಗೆ ಮತ್ತು ಹಿಂದಿರುಗುವ ಪ್ರಯಾಣದ ಶುಲ್ಕ 255 ರೂ.ಗಳಿಂದ 260 ರೂ.ಗಳಿಗೆ ಏರಿಕೆಯಾಗಿದೆ. ಪರಿಷ್ಕೃತ ದರಗಳ ಪ್ರಕಾರ, ಬೆಂಗಳೂರು ಮತ್ತು ಮೈಸೂರು ನಡುವಿನ ಏಕಮುಖ ಪ್ರಯಾಣಕ್ಕೆ 355 ರೂ.ಗಳು ವೆಚ್ಚವಾಗಲಿದೆ.
