ಮಲಯಾಳಂ ನಟ ಟೊವಿನೋ ಥಾಮಸ್ ಅವರು ತೆಲುಗಿನಲ್ಲಿ ಯಾಕೆ ಸಿನಿಮಾ ಮಾಡುತ್ತಿಲ್ಲ ಎನ್ನುವ ಬಗ್ಗೆ ಮಾತನಾಡಿದ್ದಾರೆ. ತಮಗೆ ಒತ್ತಡ ತೆಗೆದುಕೊಳ್ಳಲು ಸಾಧ್ಯವಿಲ್ಲ, ಹಾಗಾಗಿ ಒಂದೇ ಬಾರಿಗೆ ಎರಡು ಸಿನಿಮಾ ಮಾಡಲು ಆಗಲ್ಲ ಎಂದು ಹೇಳಿದ್ದಾರೆ.
ಟೊವಿನೋ ಥಾಮಸ್ ಹೆಸರು ಈಗ ಮಲಯಾಳಂಗಿಂತ ಹೆಚ್ಚಾಗಿ ತೆಲುಗಿನಲ್ಲಿ ಕೇಳಿಬರುತ್ತಿದೆ. ಅವರ ‘ಪಳ್ಳಿಚಟ್ಟಂಬಿ’ ಸಿನಿಮಾ ಇದೇ ತಿಂಗಳು 10 ರಂದು ಬಿಡುಗಡೆಯಾಗಲಿದೆ. ಈ ಚಿತ್ರದಲ್ಲಿ ಕಯಾದು ಲೋಹರ್ ನಾಯಕಿಯಾಗಿದ್ದು, ಡಿಜೋ ನಿರ್ದೇಶಿಸಿದ್ದಾರೆ. ಚಿತ್ರತಂಡ ಹೈದರಾಬಾದ್ನಲ್ಲಿ ಪ್ರಚಾರ ನಡೆಸಿದ್ದು, ಈ ವೇಳೆ ಜೂ.ಎನ್ಟಿಆರ್ ಅವರ ‘ಡ್ರ್ಯಾಗನ್’ ಸಿನಿಮಾದಲ್ಲಿ ನಟಿಸುತ್ತಿಲ್ಲ ಎಂದು ಟೊವಿನೋ ಸ್ಪಷ್ಟಪಡಿಸಿದ್ದಾರೆ. ಮಾಧ್ಯಮಗಳೊಂದಿಗೆ ಮಾತನಾಡಿದ ಅವರು ಹಲವು ಇಂಟ್ರೆಸ್ಟಿಂಗ್ ವಿಚಾರಗಳನ್ನು ಹಂಚಿಕೊಂಡರು.
ತೆಲುಗಿನಲ್ಲಿ ಸಿನಿಮಾ ಮಾಡದಿರುವ ಬಗ್ಗೆ ಮಾತನಾಡಿದ ಅವರು, ಮಲಯಾಳಂನಲ್ಲಿ ವರ್ಷಕ್ಕೆ ನಾಲ್ಕೈದು ಸಿನಿಮಾ ಮಾಡುವುದಾಗಿ ಹೇಳಿದರು. ಆದರೆ ತೆಲುಗಿನಲ್ಲಿ ಒಂದು ಸಿನಿಮಾ ಮಾಡಲು ಹೆಚ್ಚು ದಿನ ಬೇಕಾಗುತ್ತದೆ. ಡೇಟ್ಸ್ ಹೊಂದಿಸಿಕೊಳ್ಳುವುದು ಕಷ್ಟ. ಬೇರೆ ನಟರು ಹಾಗೆ ಅಡ್ಜಸ್ಟ್ ಮಾಡಿಕೊಂಡು ಮಾಡುತ್ತಾರೆ, ಆದರೆ ತಮಗೆ ಅದು ಸಾಧ್ಯವಿಲ್ಲ, ಅಷ್ಟು ಒತ್ತಡ ತೆಗೆದುಕೊಳ್ಳಲು ಆಗಲ್ಲ ಎಂದರು. ಒಂದು ಸಿನಿಮಾ ಮಾಡುವಾಗ ಮತ್ತೊಂದು ಸಿನಿಮಾ ಮಾಡಲು ಸಾಧ್ಯವಿಲ್ಲ, ಹತ್ತು ದಿನ ಇಲ್ಲಿ, ಹತ್ತು ದಿನ ಅಲ್ಲಿ ಅಂತ ಕೆಲಸ ಮಾಡಲು ಆಗಲ್ಲ. ಇದೇ ಕಾರಣಕ್ಕೆ ತೆಲುಗಿನಲ್ಲಿ ಸಿನಿಮಾ ಮಾಡುತ್ತಿಲ್ಲ ಎಂದು ಟೊವಿನೋ ತಿಳಿಸಿದರು.
ಸದ್ಯ ಮಲಯಾಳಂನಲ್ಲಿ ಕಂಫರ್ಟ್ ಆಗಿದ್ದೇನೆ, ಮಲಯಾಳಂ ಸಿನಿಮಾಗಳ ಮೂಲಕವೇ ತೆಲುಗು ಪ್ರೇಕ್ಷಕರಿಗೆ ಹತ್ತಿರವಾಗಿದ್ದೇನೆ, ಅದನ್ನೇ ಮುಂದುವರಿಸುತ್ತೇನೆ ಎಂದರು. ತಮ್ಮ ‘ಪಳ್ಳಿಚಟ್ಟಂಬಿ’ ಸಿನಿಮಾ ಬಗ್ಗೆ ಮಾತನಾಡಿದ ಟೊವಿನೋ, ‘ನಿರ್ದೇಶಕ ಡಿಜೋ ಜೋಸ್ ಆಂಟೋನಿ ನನಗೆ ಬಹಳ ಕಾಲದಿಂದ ಪರಿಚಿತರು. ನಾವು ಸಿನಿಮಾ ಮಾಡಬೇಕೆಂದುಕೊಂಡಿದ್ದೆವು. ಆದರೆ ಆಗ ಬೇರೆ ಸಿನಿಮಾಗಳಲ್ಲಿ ಬ್ಯುಸಿ ಇದ್ದಿದ್ದರಿಂದ ತಕ್ಷಣ ಸಿನಿಮಾ ಮಾಡಲು ಆಗಲಿಲ್ಲ. ಡಿಜೋ ‘ಪಳ್ಳಿಚಟ್ಟಂಬಿ’ ಕಥೆ ಹೇಳಿದಾಗ ತುಂಬಾ ಎಕ್ಸೈಟ್ ಆಯಿತು. ಈ ಸಿನಿಮಾ ಮಾಡಲು ನಿರ್ಧರಿಸಿದೆವು.
ನಂತರ ನಾನು ಒಪ್ಪಿಕೊಂಡಿದ್ದ ಸಿನಿಮಾಗಳನ್ನು ಮುಗಿಸಿದೆ. ಡಿಜೋ ಕೂಡ ‘ಜನಗಣಮನ’ ಸೇರಿದಂತೆ ಮತ್ತೊಂದು ಸಿನಿಮಾ ಮಾಡಿದರು. ನಂತರ ಈ ಚಿತ್ರದ ಕೆಲಸ ಶುರು ಮಾಡಿದೆವು. ನಿರ್ಮಾಪಕರು ಬದಲಾದರು. ಕಥೆಯ ಪ್ರಕಾರ ನಾಯಕ ಬಲಿಷ್ಠವಾಗಿ ಕಾಣಿಸಬೇಕಿತ್ತು. ಹಾಗಾಗಿ ತೂಕ ಹೆಚ್ಚಿಸಿಕೊಂಡೆ. ಅಲ್ಲಿಯವರೆಗೂ ಡಯಟಿಂಗ್ ಮಾಡುತ್ತಿದ್ದ ನಾನು, ಈ ಚಿತ್ರಕ್ಕಾಗಿ ಡಯಟಿಂಗ್ ಪಕ್ಕಕ್ಕಿಟ್ಟೆ. ಹೇರ್ ಸ್ಟೈಲ್, ಮೀಸೆ ಎಲ್ಲವನ್ನೂ ಬದಲಾಯಿಸಿ ಹೊಸ ಲುಕ್ನಲ್ಲಿ ಕಾಣಿಸಿಕೊಂಡೆ’ ಎಂದರು. ಶೂಟಿಂಗ್ ಗ್ಯಾಪ್ನಲ್ಲಿ ನಾನು ವೆಕೇಷನ್ಗೆ ಹೋಗುತ್ತೇನೆ. ನನಗೆ ಪ್ರಯಾಣ ಮಾಡುವುದು ಎಂದರೆ ತುಂಬಾ ಇಷ್ಟ.
ಕುಟುಂಬದ ಜೊತೆ ಸಮಯ ಕಳೆಯುವುದು ಖುಷಿ ಕೊಡುತ್ತದೆ. ಬಿಡುವಿಲ್ಲದೆ ಒಂದರ ಹಿಂದೆ ಒಂದು ಸಿನಿಮಾ ಮಾಡುವುದು ನನಗೆ ಇಷ್ಟವಿಲ್ಲ. ಸ್ವಲ್ಪ ವಿರಾಮ ತೆಗೆದುಕೊಂಡರೆ ಚಿತ್ರರಂಗ ಹೇಗಿದೆ ಎಂದು ಗಮನಿಸಬಹುದು. ನಾನು ಚಿತ್ರರಂಗದಲ್ಲಿದ್ದರೂ, ಹೊರಗಿನವನಂತೆ ಎಲ್ಲವನ್ನೂ ಗಮನಿಸಲು ಇಷ್ಟಪಡುತ್ತೇನೆ. ತೆಲುಗಿನಲ್ಲಿ ಇಲ್ಲಿಯವರೆಗೆ ಸಾಕಷ್ಟು ಸಿನಿಮಾಗಳ ಚರ್ಚೆ ನಡೆದಿದೆ, ಆದರೆ ಯಾವುದೂ ಅಂತಿಮವಾಗಿಲ್ಲ. ಮಲಯಾಳಂನಲ್ಲಿ ನಾನು ಉತ್ತಮ ಸ್ಥಾನದಲ್ಲಿದ್ದೇನೆ. ಅಲ್ಲಿನ ಸಿನಿಮಾಗಳನ್ನು ಬಿಟ್ಟು ಬೇರೆ ಭಾಷೆಗೆ ಬಂದರೆ, ನನ್ನನ್ನು ನಂಬಿ ಪ್ರಾಜೆಕ್ಟ್ ಮಾಡುವವರು ನಷ್ಟ ಅನುಭವಿಸುತ್ತಾರೆ. ನಿರ್ಮಾಪಕರಾದ ನೌಫಲ್ ಮತ್ತು ಬ್ರಿಜೇಶ್ ಈ ಹಿಂದೆ ನನ್ನ ಸಿನಿಮಾಗಳನ್ನು ವಿತರಿಸುತ್ತಿದ್ದರು.
ನಿರ್ದೇಶಕ ಡಿಜೋ ಈ ಸಿನಿಮಾಗಾಗಿ ಏನು ಕೇಳಿದರೂ ಕಾಂಪ್ರಮೈಸ್ ಆಗದೆ ಒದಗಿಸಿದ್ದಾರೆ. ತೆಲುಗು ನಿರ್ಮಾಪಕರಾದ ಚೈತನ್ಯ, ಚಾಣಕ್ಯ, ಚರಣ್ ನಮ್ಮ ಸಿನಿಮಾ ನಿರ್ಮಿಸುತ್ತಿರುವುದು ಖುಷಿ ತಂದಿದೆ. ಜೇಕ್ಸ್ ಬಿಜೋಯ್ ಅವರ ಸಂಗೀತವು ನಮ್ಮ ಸಿನಿಮಾದ ತೀವ್ರತೆಯನ್ನು ಮತ್ತಷ್ಟು ಹೆಚ್ಚಿಸಿದೆ’ ಎಂದರು. ‘ಪಳ್ಳಿಚಟ್ಟಂಬಿ’ ಸಿನಿಮಾ 50ರ ದಶಕದಲ್ಲಿ ಕೇರಳದಲ್ಲಿ ನಡೆದ ಘಟನೆಗಳಿಂದ ಸ್ಫೂರ್ತಿ ಪಡೆದ ಒಂದು ಕಾಲ್ಪನಿಕ ಕಥೆ. ಆಗಿನ ಸಾಮಾಜಿಕ ಪರಿಸ್ಥಿತಿ ಹೇಗಿತ್ತು ಎಂಬುದನ್ನು ಸಿನಿಮಾದಲ್ಲಿ ತೋರಿಸಿದ್ದೇವೆ. ಆದರೆ ನಮ್ಮ ಅಭಿಪ್ರಾಯಗಳನ್ನು ಹೇರಿಲ್ಲ. ಮಾನವೀಯತೆಯೇ ಮುಖ್ಯ ಎನ್ನುವ ಅಂಶವನ್ನು ತೋರಿಸುತ್ತಿದ್ದೇವೆ.
ಸಿನಿಮಾ ನೋಡಲು ಭಾಷೆ ಅಡ್ಡಿಯಾಗಲ್ಲ
ನನ್ನ ವೈಯಕ್ತಿಕ ಅಭಿಪ್ರಾಯದಲ್ಲೂ ನಾವೆಲ್ಲರೂ ಒಂದೇ. ಯಾರೂ ಹೆಚ್ಚು, ಯಾರೂ ಕಡಿಮೆ ಅಲ್ಲ. ‘ಪಳ್ಳಿಚಟ್ಟಂಬಿ’ ಒಂದು ಸುಂದರವಾದ ಭಾವನಾತ್ಮಕ ಚಿತ್ರ, ಇಡೀ ಕುಟುಂಬ ಒಟ್ಟಿಗೆ ನೋಡಬಹುದು. ಇದರಲ್ಲಿ ಯಾವುದೇ ಧರ್ಮದ ಬಗ್ಗೆ ಪ್ರಸ್ತಾಪವಿಲ್ಲ ಅಥವಾ ಯಾವುದೇ ಧರ್ಮವನ್ನು ಕೀಳಾಗಿ ತೋರಿಸಿಲ್ಲ. ಕಥೆಗೆ ಅನುಗುಣವಾಗಿ ಚರ್ಚ್ ಹಿನ್ನೆಲೆಯ ದೃಶ್ಯಗಳಿವೆ. ಆ ಜಾಗದಲ್ಲಿ ಬೇರೆ ದೇವಸ್ಥಾನ ಇಟ್ಟರೂ ಕಥೆಯಲ್ಲಿ ಬದಲಾವಣೆ ಆಗುತ್ತಿರಲಿಲ್ಲ. ಸಾಮಾಜಿಕ-ರಾಜಕೀಯ ಅಂಶಗಳು ಪ್ರಮುಖವಾಗಿವೆ. ಸಿನಿಮಾ ನೋಡಲು ಭಾಷೆ ಅಡ್ಡಿಯಾಗಲ್ಲ. ನಾವು ಓಟಿಟಿಯಲ್ಲಿ ಬೇರೆ ಬೇರೆ ಭಾಷೆಗಳ ಸಿನಿಮಾಗಳನ್ನು ನೋಡಿ ಎಂಜಾಯ್ ಮಾಡುತ್ತೇವೆ. ನನಗೆ ತೆಲುಗು ಬರದಿದ್ದರೂ, ಚಿಕ್ಕವನಿದ್ದಾಗ ಚಿರಂಜೀವಿ ನಟನೆಯ ‘ಜಗದೇಕ ವೀರುಡು ಅತಿಲೋಕ ಸುಂದರಿ’ ಮತ್ತು ‘ಆರ್ಯ’ ಸಿನಿಮಾಗಳನ್ನು ನೋಡಿ ಎಂಜಾಯ್ ಮಾಡಿದ್ದೆ’ ಎಂದು ಟೊವಿನೋ ಹೇಳಿದರು.
