ನಮ್ಮ ಮನೆಯಲ್ಲಿ ಹೆಚ್ಚಾಗಿ ಕಂಡುಬರುವ ಮತ್ತು ದಿನನಿತ್ಯ ಬಳಸುವ ಮೂರು ಸಾಮಾನ್ಯ ವಸ್ತುಗಳು ಲಿವರ್ ಆರೋಗ್ಯಕ್ಕೆ ಹೇಗೆ ಹಾನಿ ಮಾಡುತ್ತವೆ ಎಂಬ ಬಗ್ಗೆ ಮಾಹಿತಿ ನೀಡಿದ್ದಾರೆ ಪ್ರಸಿದ್ಧ ಗ್ಯಾಸ್ಟ್ರೋಎಂಟರಾಲಜಿಸ್ಟ್ ಸೌರಭ್ ಸೇಥಿ.
ನಿಮ್ಮ ದೇಹದ ಎಲ್ಲಾ ಅಂಗಗಳು ನಿರಂತರವಾಗಿ ಕೆಲಸ ಮಾಡುತ್ತಲೇ ಇರುತ್ತವೆ. ಆದರೆ ನೀವು ಅವುಗಳ ಆರೋಗ್ಯವನ್ನು ನೋಡಿಕೊಳ್ಳಲು ಸಮರ್ಥರಾಗಿದ್ದೀರಾ?. ಒಂದು ವೇಳೆ ನಿಮ್ಮ ಉತ್ತರ ‘ಹೌದು’ ಎಂದಾದರೆ ಇದು ನಿಮ್ಮ ತಪ್ಪು ಕಲ್ಪನೆ. ಏಕೆಂದರೆ ಕೆಲವೊಮ್ಮೆ ನಮ್ಮ ಜೊತೆಯಲ್ಲಿರುವ ವಸ್ತುಗಳೇ ಅಂಗಗಳ ಆರೋಗ್ಯವನ್ನು ಡ್ಯಾಮೇಜ್ ಮಾಡುತ್ತವೆ.
ಹಾರ್ವರ್ಡ್ನಲ್ಲಿ ತರಬೇತಿ ಪಡೆದ ವೈದ್ಯ, ಪ್ರಸಿದ್ಧ ಗ್ಯಾಸ್ಟ್ರೋಎಂಟರಾಲಜಿಸ್ಟ್ ಆಗಿರುವ ಸೌರಭ್ ಸೇಥಿ ಅವರು ತಮ್ಮ ಇನ್ಸ್ಟಾಗ್ರಾಮ್ ಪೋಸ್ಟ್ನಲ್ಲಿ ಈ ವಿಷಯದ ಕುರಿತು ಶೇರ್ ಮಾಡಿದ್ದು, ಇದರಲ್ಲಿ ನಮ್ಮ ಮನೆಯಲ್ಲಿ ಹೆಚ್ಚಾಗಿ ಕಂಡುಬರುವ ಮತ್ತು ದಿನನಿತ್ಯ ಬಳಸುವ ಮೂರು ಸಾಮಾನ್ಯ ವಸ್ತುಗಳು ಲಿವರ್ ಆರೋಗ್ಯಕ್ಕೆ ಹೇಗೆ ಹಾನಿ ಮಾಡುತ್ತವೆ ಎಂಬ ಬಗ್ಗೆ ಮಾಹಿತಿ ನೀಡಿದ್ದಾರೆ. ಏಕೆಂದರೆ ಈ ಕಾರಣದಿಂದಲೂ ಸಹ ಲಿವರ್ ಸರಿಯಾಗಿ ಕಾರ್ಯನಿರ್ವಹಿಸಲು ಸಾಧ್ಯವಾಗುವುದಿಲ್ಲ.
ಆ ಮೂರು ವಸ್ತುಗಳು ಯಾವುವು?
ನಮಗೆಲ್ಲರಿಗೂ ತಿಳಿದಿರುವಂತೆ ಲಿವರ್ ನಮ್ಮನ್ನು ಆರೋಗ್ಯವಾಗಿಡಲು ಅನೇಕ ಪ್ರಮುಖ ಕಾರ್ಯಗಳನ್ನು ನಿರ್ವಹಿಸುತ್ತದೆ. ಆದರೆ ಅದರ ಕಾರ್ಯದಲ್ಲಿ ಅಡಚಣೆ ಉಂಟಾದರೆ ಅದು ನಮ್ಮ ಒಟ್ಟಾರೆ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತದೆ. ಹಾಗಾಗಿ ಸಮಯಕ್ಕೆ ಸರಿಯಾಗಿ ಜಾಗರೂಕರಾಗಿರುವುದು ಮತ್ತು ಈ ಮೂರು ವಸ್ತುಗಳಿಂದ ದೂರವಿರುವುದು ಮುಖ್ಯ. ಇದರಿಂದ ನಮ್ಮ ಯಕೃತ್ತು ಮತ್ತು ನಾವು ಇಬ್ಬರೂ ಆರೋಗ್ಯವಾಗಿರಲು ಸಾಧ್ಯವಾಗುತ್ತದೆ.
ಮನೆ ಕ್ಲೀನ್ ಮಾಡೋಕೆ ಬಳಸುವ ವಸ್ತುಗಳಲ್ಲಿ…
ಇದನ್ನು ಓದಿದರೆ ನಿಮಗೆ ಆಶ್ಚರ್ಯವಾಗಬಹುದು. ಆದರೆ ಮನೆಯನ್ನು ಸ್ವಚ್ಛ ಮಾಡಲೆಂದು ಬಳಸುವ ಉತ್ಪನ್ನಗಳು ಯಕೃತ್ತು ಅಂದರೆ ಲಿವರ್ ಆರೋಗ್ಯದ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತವೆ. ಏಕೆಂದರೆ ಅವುಗಳಲ್ಲಿ ಕೆಲವು ರಾಸಾಯನಿಕಗಳಿವೆ. ಇದು ಉಸಿರಾಟ ಅಥವಾ ಚರ್ಮದ ಸಂಪರ್ಕದ ಮೂಲಕ ದೇಹವನ್ನು ಪ್ರವೇಶಿಸುವ ಮೂಲಕ ಲಿವರ್ಗೆ ಹಾನಿ ಮಾಡುತ್ತದೆ. ಲಿವರ್ ಫೌಂಡೇಶನ್ ಪ್ರಕಾರ , ಲಿವರ್ಗೆ ಹಾನಿ ಮಾಡುವ ಸಾಮಾನ್ಯ ರಾಸಾಯನಿಕಗಳಲ್ಲಿ ಕಾರ್ಬನ್ ಟೆಟ್ರಾಕ್ಲೋರೈಡ್ (ಡ್ರೈ ಕ್ಲೀನಿಂಗ್ನಲ್ಲಿ ಬಳಸುವ ದ್ರಾವಕ), ವಿನೈಲ್ ಕ್ಲೋರೈಡ್, ಪ್ಯಾರಾಕ್ವಾಟ್ ಮತ್ತು ಪಾಲಿಕ್ಲೋರಿನೇಟೆಡ್ ಬೈಫಿನೈಲ್ಗಳು ಸೇರಿವೆ.
ಕೀಟನಾಶಕಗಳ ಬಳಕೆ
ಇದಲ್ಲದೆ ಕೀಟನಾಶಕಗಳನ್ನು ಸಹ ಲಿವರ್ ಆರೋಗ್ಯಕ್ಕೆ ತುಂಬಾ ಅಪಾಯಕಾರಿ ಎಂದು ಪರಿಗಣಿಸಲಾಗುತ್ತದೆ. ಕೀಟನಾಶಕಗಳು ದೇಹವನ್ನು ನೇರವಾಗಿ ಅಥವಾ ಪರೋಕ್ಷವಾಗಿ ತಲುಪಬಹುದು. ಲಿವರ್ ಕಾರ್ಯವು ರಕ್ತದಿಂದ ಟಾಕ್ಸಿನ್ ಶುದ್ಧೀಕರಿಸುವುದಾಗಿದ್ದರೂ, ಈ ವಸ್ತುಗಳೊಂದಿಗೆ ಸಂಪರ್ಕದಲ್ಲಿರುವುದು ಲಿವರ್ಗೆ ಹಾನಿಕಾರಕವಾಗಿದೆ. ಆದ್ದರಿಂದ ಕೀಟನಾಶಕಗಳ ಸಂಪರ್ಕಕ್ಕೆ ಬರುವುದನ್ನು ತಪ್ಪಿಸಲು ರಾಸಾಯನಿಕ ಉತ್ಪನ್ನಗಳ ಎಚ್ಚರಿಕೆ ಲೇಬಲ್ಗಳನ್ನು ಯಾವಾಗಲೂ ಓದಿ..
ಸೌಂದರ್ಯವರ್ಧಕಗಳು
ಕೆಲವು ಸೌಂದರ್ಯವರ್ಧಕಗಳು ಸಹ ನಿಮ್ಮ ಲಿವರ್ಗೆ ಹಾನಿ ಮಾಡುವ ವಿಷಕಾರಿ ವಸ್ತುಗಳಿಂದ ತುಂಬಿರುತ್ತವೆ ಎಂದು ಡಾ. ಸೇಥಿ ಹೇಳಿದ್ದಾರೆ. ಸೌಂದರ್ಯವರ್ಧಕ ಉತ್ಪನ್ನಗಳಲ್ಲಿ ಕಂಡುಬರುವ ಸಂಶ್ಲೇಷಿತ ರಾಸಾಯನಿಕಗಳಾದ PFAS ಲಿವರ್ ಹಾನಿ ಮಾಡುವ ಸಾಧ್ಯತೆಯಿದೆ ಎಂದು ಕಂಡುಹಿಡಿಯಲಾಗಿದೆ. PFAS ಗೆ ಒಡ್ಡಿಕೊಳ್ಳುವುದರಿಂದ ಆಲ್ಕೊಹಾಲ್ಯುಕ್ತವಲ್ಲದ ಕೊಬ್ಬಿನ ಪಿತ್ತಜನಕಾಂಗದ ಕಾಯಿಲೆ (NAFLD) ನಂತಹ ಯಕೃತ್ತಿನ ಸಮಸ್ಯೆಗಳ ಹೆಚ್ಚಳಕ್ಕೆ ಕಾರಣವಾಗಬಹುದು.
ಹಾಗಾದ್ರೆ ಏನ್ ಮಾಡ್ಬೇಕು?
ಈ ರಾಸಾಯನಿಕಗಳು ನಿಮ್ಮ ಲಿವರ್ಗೆ ಯಾವ ಗತಿ ಒದಗಿಸುತ್ತವೆ ಎಂಬುದನ್ನು ನೀವೀಗ ತಿಳಿದುಕೊಂಡಿರಿ. ಆದ್ದರಿಂದ ಈ ಹಾನಿ ತಪ್ಪಿಸಲು, ಮೇಲೆ ತಿಳಿಸಲಾದ ವಿಷಕಾರಿ ವಸ್ತುಗಳ ಸಂಪರ್ಕಕ್ಕೆ ಬರುವುದನ್ನು ತಪ್ಪಿಸಿ ಅಥವಾ ಬಳಸುವುದನ್ನು ತಪ್ಪಿಸಿ. ಇದರ ಬದಲಾಗಿ ನೈಸರ್ಗಿಕ ಪರ್ಯಾಯಗಳನ್ನು ಅಳವಡಿಸಿಕೊಳ್ಳಿ.
Disclaimer: ಈ ಲೇಖನವು ಸಾಮಾನ್ಯ ಮಾಹಿತಿಗಾಗಿ ಮಾತ್ರ. ಹೆಚ್ಚಿನ ಮಾಹಿತಿಗಾಗಿ ಯಾವಾಗಲೂ ನಿಮ್ಮ ವೈದ್ಯರನ್ನು ಸಂಪರ್ಕಿಸಿ.
