Bigg Bossನಲ್ಲಿ ಹವಾ ಸೃಷ್ಟಿಸಿರೋ ಗಿಲ್ಲಿ ನಟನ ಯುಟ್ಯೂಬ್​ ಆದಾಯ ಎಷ್ಟು ಗೊತ್ತಾ? | Bigg Boss Gilli Natas Youtube Income Reveled Suc

ಈ ಬಾರಿಯ ಬಿಗ್​ಬಾಸ್​ (Bigg Boss)ನಲ್ಲಿ ಗಿಲ್ಲಿ ನಟನ ಹವಾ ಜೋರಾಗಿಯೇ ಇದೆ. ಇವರೇ ವಿನ್ನರ್​ ಎಂದು ಇದಾಗಲೇ ಸೋಷಿಯಲ್​ ಮೀಡಿಯಾದಲ್ಲಿ ಸಾಕಷ್ಟು ಮಂದಿ ಘೋಷಿಸಿಯೂ ಆಗಿದ್ದು, ಬಿಗ್​ಬಾಸ್​ನಿಂದ ಎಲಿಮಿನೇಟ್​ ಆಗಿ ಹೊರಕ್ಕೆ ಬಂದಿರೋ ಸ್ಪರ್ಧಿಗಳು ಹಾಗೂ ಹಿಂದಿನ ಸ್ಪರ್ಧಿಗಳ ಪೈಕಿ ಹಲವರು ಕೂಡ ಗಿಲ್ಲಿ ನಟನ ಹೆಸರನ್ನೇ ಹೇಳಿದ್ದಾರೆ.

ಕಾಮಿಡಿಯ ಮೂಲಕವೇ ಜನಮನ ಗೆದ್ದಿರೋ ಗಿಲ್ಲಿ ನಟ (Bigg Boss Gilli Nata) ರಿಯಲ್​ ಹೆಸರು ನಟರಾಜ್​. ಮಂಡ್ಯ ಜಿಲ್ಲೆಯ ಮಳವಳ್ಳಿ ತಾಲೂಕಿನ ದಡದಪುರದ ರೈತಾಪಿ ಕುಟುಂಬದವರು ಇವರು. ಎಸ್​ಎಸ್​ಎಲ್​ಸಿ ಬಳಿಕ 2 ವರ್ಷಗಳ ಐಟಿಐ ಕೋರ್ಸ್​ ಮುಗಿಸಿ ಯುಟ್ಯೂಬ್​ ಶುರು ಮಾಡಿ ಅಲ್ಲಿಂದಲೇ ಜನಪ್ರಿಯವಾದವರು.

ಊರಿನ ಜನರನ್ನೆಲ್ಲಾ ಒಟ್ಟುಗೂಡಿಸಿ ಕಾಮಿಡಿ ಸ್ಕಿಟ್‌ ಮಾಡಿ ಸೋಷಿಯಲ್​ ಮೀಡಿಯಾದಲ್ಲಿ ಅಪ್​ಲೋಡ್​ ಮಾಡುತ್ತಿದ್ದ ಇವರ ʻನಲ್ಲಿಮೂಳೆʼ ಸಕತ್​ ಫೇಮಸ್​​ ಆಗಿ, ಮಿಲಿಯನ್‌ಗಟ್ಟಲೇ ವ್ಯೂವ್ಸ್​ ಬಂದು, ರಿಯಾಲಿಟಿ ಷೋಗೆ ಅವಕಾಶ ಸಿಕ್ಕು, ಈಗ ಬಿಗ್​ಬಾಸ್​ವರೆಗೂ ಹೋಗಿದ್ದಾರೆ.

ಇನ್ನು ಇವರ ಯುಟ್ಯೂಬ್​ ಆದಾಯದ ಕುರಿತು ಯುಟ್ಯೂಬರ್​ ಪ್ರಶಾಂತ್​ ಅವರು ಇನ್​ಸ್ಟಾಗ್ರಾಮ್​ನಲ್ಲಿ ಮಾಹಿತಿ ನೀಡಿದ್ದಾರೆ. ಗಿಲ್ಲಿ ನಟ ಹಾಕಿರುವ ವಿಡಿಯೋ ಇತ್ಯಾದಿಗಳ ಲೆಕ್ಕಾಚಾರದ ಆಧಾರದ ಮೇಲೆ ಅವರು ಈ ಮಾಹಿತಿಯನ್ನು ಶೇರ್​ ಮಾಡಿದ್ದಾರೆ.

ಇವರ ಚಾನೆಲ್​ನಲ್ಲಿ 2.34 ಲಕ್ಷ ಜನ ಚಂದಾದಾರರು ಇದ್ದಾರೆ. 14 ವಿಡಿಯೋ ಅಪ್​ಲೋಡ್​ ಮಾಡಿದ್ದಾರೆ. ಏಕೆಂದರೆ ಇವರ ಸೋಷಿಯಲ್​ ಮೀಡಿಯಾದಲ್ಲಿ ಹಲವು ವಿಡಿಯೋಗಳು ಇದ್ದರೂ, ಅವುಗಳನ್ನೆಲ್ಲಾ ಗಿಲ್ಲಿ ನಟ ನಿರ್ದೇಶಿಸಿರುವುದು ಮಾತ್ರ ಆಗಿರುವ ಕಾರಣ, ಈ ಲೆಕ್ಕಾಚಾರ ಗಿಲ್ಲಿನಟ ಶೇರ್​ ಮಾಡಿರುವ ವಿಡಿಯೋಗಳ ಸಂಪಾದನೆ ಲೆಕ್ಕಾಚಾರವಾಗಿದೆ.

ಇವರ ವಿಡಿಯೋ ಡ್ಯುರೇಷನ್​ 8 ರಿಂದ 12 ನಿಮಿಷಗಳು ಇವೆ. ಮನೋರಂಜನಾ ಕ್ಯಾಟಗರಿಗೆ ಸೇರಿವೆ. ಇದನ್ನೆಲ್ಲಾ ಪರಿಗಣನೆಗೆ ತೆಗೆದುಕೊಂಡರೆ ಇವರ ಒಂದು ಲಕ್ಷ ವ್ಯೂವ್ಸ್​ಗೆ 50 ಸಾವಿರ ರೂಪಾಯಿ ಸಿಗುತ್ತದೆ. ಏಕೆಂದರೆ ಒಂದು ಸಾವಿರ ವ್ಯೂವ್ಸ್​ಗೆ ಸಿಗುವುದು 50 ರೂಪಾಯಿಗಳು.

ಗಿಲ್ಲಿ ನಟನ ಇದುವರೆಗಿನ ವಿಡಿಯೋಗಳ ವೀಕ್ಷಣೆ 37.33 ಮಿಲಿಯನ್​ ಆಗಿರುವ ಕಾರಣ, 18 ಲಕ್ಷದ 66 ಸಾವಿರ ರೂಪಾಯಿಗಳನ್ನು ಅಂದಾಜು ಗಳಿಸಿದ್ದಾರೆ ಎಂದು ಪ್ರಶಾಂತ್​ ಅವರು ಲೆಕ್ಕಾಚಾರ ಹಾಕಿದ್ದಾರೆ.