ಇನ್ಮುಂದೆ ಹ್ಯಾಷ್ಟ್ಯಾಗ್ ಬಳಸುವಂತಿಲ್ಲ ಎಂದಿರುವ ಎಕ್ಸ್ ಮೈಕ್ರೋಬ್ಲಾಗಿಂಗ್ ಪ್ಲಾಟ್‌ಫಾರ್ಮ್‌ನ ಸಿಇಒ ಎಲಾನ್ ಮಸ್ಕ್, ನಾಳೆಯಿಂದಲೇ ಅದು ಜಾರಿ ಎಂದಿದ್ದಾರೆ. ಯಾರಿಗೆ ಅನ್ವಯ? ಡಿಟೇಲ್ಸ್ ಇಲ್ಲಿದೆ…
ಸೋಷಿಯಲ್ ಮೀಡಿಯಾ ಬಳಕೆದಾರರಿಗೆ ಹ್ಯಾಷ್ಟ್ಯಾಗ್ಗಳೇ ಬಂಡವಾಳ. ವಿಷಯವನ್ನು ಹುಡುಕಲು ಮತ್ತು ವರ್ಗೀಕರಿಸಲು ಹ್ಯಾಷ್ಟ್ಯಾಗ್ಗಳು ಬಹಳ ಪ್ರಮುಖ ಪಾತ್ರವನ್ನು ವಹಿಸುತ್ತವೆ. ಇದೇ ಕಾರಣಕ್ಕೆ ಇಂದು ಬಹುತೇಕ ಎಲ್ಲರೂ ಅವರು ಸೋಷಿಯಲ್ ಮೀಡಿಯಾದಲ್ಲಿ ಹಾಕುವ ವಿಷಯಕ್ಕಿಂತಲೂ ಹೆಚ್ಚಿನದಾಗ ಹ್ಯಾಷ್ಟ್ಯಾಗ್ ಹಾಕುತ್ತಾರೆ, ಇನ್ನು ಕೆಲವರಂತೂ ಅವರು ಅಪ್ಲೋಡ್ ಮಾಡುವ ವಿಡಿಯೋಕ್ಕೂ, ಹ್ಯಾಷ್ಟ್ಯಾಗ್ಗೂ ಸಂಬಂಧವೇ ಇರುವುದಿಲ್ಲ. ಆದರೆ ನಟ, ನಟಿಯರ ಹೆಸರು ಸೇರಿದಂತೆ ಒಂದಿಷ್ಟು ಫೇಮಸ್ ಹ್ಯಾಷ್ಟ್ಯಾಗ್ ಹಾಕುವ ಮೂಲಕ, ಟ್ರೆಂಡ್ನಲ್ಲಿ ಇರುವ ವಿಷಯ ಸರ್ಚ್ ಮಾಡಿದಾಗ ತಮ್ಮದೂ ವಿಡಿಯೋ ಸಿಗಲಿ ಎಂದು ಕಿತಾಪತಿ ಮಾಡುತ್ತಾರೆ. ಅಲ್ಲಿ ಅವರು ಹಾಕಿರುವ ಹ್ಯಾಷ್ಟ್ಯಾಗ್ಗೂ, ಅವರ ವಿಡಿಯೋಕ್ಕೂ ತಾಳಮೇಳವೇ ಇರುವುದಿಲ್ಲ. ಒಟ್ಟಿನಲ್ಲಿ ಹ್ಯಾಷ್ಟ್ಯಾಗ್ ಎನ್ನುವುದು ಸೋಷಿಯಲ್ ಮೀಡಿಯಾ ಬಳಕೆದಾರರಿಗೆ ಭಾರಿ ಬಂಡವಾಳ.
ಆದರೆ ಅದನ್ನೇ ಬಳಸದಂತೆ ನಿರ್ಬಂಧ ಹೇರಿಬಿಟ್ಟರೆ? ಇದನ್ನು ಊಹಿಸಿಕೊಳ್ಳುವುದೂ ಕಷ್ಟವೇ. ಆದರೆ ಇದೀಗ ನಾಳೆಯಿಂದಲೇ ಅಂದ್ರೆ ಜೂನ್ 27ರಂದು ಹ್ಯಾಷ್ಟ್ಯಾಗ್ ಬ್ಯಾನ್ ಮಾಡಿದ್ದಾರೆ ಎಕ್ಸ್ (ಹಿಂದಿನ ಟ್ವಿಟರ್) ಮೈಕ್ರೋಬ್ಲಾಗಿಂಗ್ ಪ್ಲಾಟ್‌ಫಾರ್ಮ್‌ನ ಸಿಇಒ ಎಲಾನ್ ಮಸ್ಕ್. ಅವರು ಎಕ್ಸ್ ಖಾತೆಯಲ್ಲಿ ಹ್ಯಾಷ್ಟ್ಯಾಗ್ ಹಾಕುವುದಕ್ಕೆ ನಿರ್ಬಂಧ ವಿಧಿಸಿದ್ದಾರೆ. ಹಾಗೆಂದು ಎಕ್ಸ್ ಖಾತೆದಾರರೆಲ್ಲಾ ಭಯಪಡುವ ಅಗತ್ಯವಿಲ್ಲ. ಸದ್ಯ ಈ ರೀತಿ ಬ್ಯಾನ್ ಆಗಿರುವುದು ಜಾಹೀರಾತು ನೀಡುವವರಿಗೆ ಮಾತ್ರ. X ನಲ್ಲಿರುವ ಖಾತೆಗಳು ನಾಳೆಯಿಂದ ತಮ್ಮ ಜಾಹೀರಾತುಗಳಲ್ಲಿ ಹ್ಯಾಷ್ಟ್ಯಾಗ್ಗಳನ್ನು ಬಳಸಲು ಸಾಧ್ಯವಾಗುವುದಿಲ್ಲ ಎಂದು ಎಲಾನ್ ಮಸ್ಕ್ ಗುರುವಾರ ತಿಳಿಸಿದ್ದಾರೆ. ಹ್ಯಾಷ್ಟ್ಯಾಗ್ಗಳನ್ನು ‘ಸೌಂದರ್ಯದ ದುಃಸ್ವಪ್ನ’ ಎಂದು ಕರೆದಿರುವ ಅವರು, ಶುಕ್ರವಾರದಿಂದ ನಿಷೇಧವನ್ನು ಜಾರಿಗೆ ತರಲಾಗುವುದು ಎಂದು ಹೇಳಿದ್ದಾರೆ.
ಜಾಹೀರಾತುಗಳು ಎಂದು ಮಸ್ಕ್ ಸ್ಪಷ್ಟವಾಗಿ ಹೇಳಿರುವುದಿರಂದ, X ನಲ್ಲಿನ ಸಾಮಾನ್ಯ ಪೋಸ್ಟ್‌ಗಳು ಇನ್ನೂ ಹ್ಯಾಷ್ಟ್ಯಾಗ್ಗಳನ್ನು ಬಳಸಲು ಸಾಧ್ಯವಾಗುತ್ತದೆ ಎಂದು ತಿಳಿದುಬರುತ್ತದೆ. ಹೊಸ ನಿಯಮವು ಮೈಕ್ರೋಬ್ಲಾಗಿಂಗ್ ಪ್ಲಾಟ್‌ಫಾರ್ಮ್‌ನಲ್ಲಿನ ಜಾಹೀರಾತುಗಳಿಗೆ ಮಾತ್ರ ಅನ್ವಯಿಸುತ್ತದೆ ಎಂದು ಮಸ್ಕ್ ನಿರ್ದಿಷ್ಟವಾಗಿ ಉಲ್ಲೇಖಿಸಿದ್ದಾರೆ. ಡಿಸೆಂಬರ್ 2024 ರಲ್ಲಿ ಎಲಾನ್ ಮಸ್ಕ್ ಹ್ಯಾಷ್ಟ್ಯಾಗ್ಗಳನ್ನು ‘ಕೊಳಕು’ ಎಂದು ಕರೆದ ತಿಂಗಳುಗಳ ನಂತರ X ಜಾಹೀರಾತುಗಳ ಮೇಲಿನ ಅವುಗಲ ನಿಷೇಧ ಬಂದಿದೆ ಮತ್ತು ಜನರು ಅದನ್ನು ಇನ್ನು ಮುಂದೆ ಬಳಸದಂತೆ ಒತ್ತಾಯಿಸಿದ್ದಾರೆಎ.
“ದಯವಿಟ್ಟು ಹ್ಯಾಶ್‌ಟ್ಯಾಗ್‌ಗಳನ್ನು ಬಳಸುವುದನ್ನು ನಿಲ್ಲಿಸಿ. ಈ ವ್ಯವಸ್ಥೆಗೆ ಇನ್ನು ಮುಂದೆ ಅವುಗಳ ಅಗತ್ಯವಿಲ್ಲ, ಮತ್ತು ಅವು ಕೊಳಕು ಕಾಣುತ್ತವೆ” ಎಂದು ಅವರು ಪೋಸ್ಟ್‌ಗೆ ಉತ್ತರಿಸಿದ್ದಾರೆ. ಅಷ್ಟಕ್ಕೂ ಹ್ಯಾಶ್‌ಟ್ಯಾಗ್‌ಗಳನ್ನು ಮೊದಲು 2007 ರಲ್ಲಿ ಟ್ವಿಟರ್, ಈಗ X ಎಂದು ಕರೆಯಲ್ಪಡುತ್ತದೆ, ಜನಪ್ರಿಯಗೊಳಿಸಿತು. X ನಲ್ಲಿ ಜಾಹೀರಾತುಗಳಿಗಾಗಿ ಹ್ಯಾಶ್‌ಟ್ಯಾಗ್‌ಗಳನ್ನು ನಿಷೇಧಿಸುವ ಎಲೋನ್ ಮಸ್ಕ್ ಅವರ ಕ್ರಮವನ್ನು X ನಲ್ಲಿ ಬಳಕೆದಾರರು ಶ್ಲಾಘಿಸಿದ್ದಾರೆ. ಜಾಹೀರಾತುಗಳ ಕಿರಿಕಿರಿ ಒಂದೆಡೆಯಾದರೆ, ಈ ಹ್ಯಾಷ್ಟ್ಯಾಗ್ಗಳೂ ಕಿರಿಕಿರಿ ಮಾಡುತ್ತಿದ್ದವು, ಇದು ತುಂಬಾ ಒಳ್ಳೆಯ ನಡೆ ಎಂದು ಪ್ರಶಂಸಿಸಿದ್ದಾರೆ. ಆದರೆ ಇದನ್ನೇ ಮುಂದೊಂದು ದಿನ ಸಾಮಾನ್ಯ ಬಳಕೆದಾರರ ಮೇಲೆ ಹೇರಬೇಡಿ ಎಂದೂ ಮನವಿ ಮಾಡಿಕೊಂಡಿದ್ದಾರೆ.
