ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಬೆದರಿಕೆಗಳಿಗೆ ಇರಾನ್ ಸೇನೆ ತಕ್ಕ ಉತ್ತರ ನೀಡಿದೆ. ಅಮೆರಿಕ ಮತ್ತು ಇಸ್ರೇಲ್ ಶರಣಾಗುವವರೆಗೂ ನಮ್ಮ ಹೋರಾಟ ನಿಲ್ಲುವುದಿಲ್ಲ. ನಮ್ಮ ಸೇನಾ ಸಾಮರ್ಥ್ಯದ ಬಗ್ಗೆ ನಿಮಗೆ ಕಲ್ಪನೆಯೂ ಇಲ್ಲ ಎಂದು ಇರಾನ್ ಖಡಕ್ಕಾಗಿ ಎಚ್ಚರಿಸಿದೆ.
ಟೆಹ್ರಾನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಹೇಳಿಕೆಗಳಿಗೆ ಇರಾನ್ ಸೇನೆ ತೀಕ್ಷ್ಣವಾಗಿ ತಿರುಗೇಟು ನೀಡಿದೆ. ಯುದ್ಧ ಮುಗಿಯುವ ಹಂತದಲ್ಲಿದೆ ಎಂಬ ಟ್ರಂಪ್ ಅವರ ವಾದವನ್ನು ತಳ್ಳಿಹಾಕಿರುವ ಇರಾನ್, ಅಮೆರಿಕ ಮತ್ತು ಇಸ್ರೇಲ್ ಸಂಪೂರ್ಣವಾಗಿ ಶರಣಾಗುವವರೆಗೂ ನಮ್ಮ ಹೋರಾಟ ನಿಲ್ಲುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ. ಇರಾನ್ನ ಅಧಿಕೃತ ಮಾಧ್ಯಮವಾದ IRIB ಮೂಲಕ ಸೇನಾ ವಕ್ತಾರರು ಈ ಹೇಳಿಕೆಯನ್ನು ಬಿಡುಗಡೆ ಮಾಡಿದ್ದಾರೆ.
ಬುಧವಾರ ಸಂಜೆ ಮಾತನಾಡಿದ್ದ ಟ್ರಂಪ್, ‘ಇರಾನ್ ಅನ್ನು ಶಿಲಾಯುಗಕ್ಕೆ ವಾಪಸ್ ಕಳುಹಿಸುತ್ತೇವೆ, ಅವರನ್ನು ಸೇನಾ ಸಮೇತವಾಗಿ ನಾಶ ಮಾಡುತ್ತೇವೆ ಎಂದು ಎಚ್ಚರಿಕೆ ನೀಡಿದ್ದರು. ಇದಕ್ಕೆ ಪ್ರತ್ಯುತ್ತರವಾಗಿ ಇರಾನ್, ‘ನಾವು ಈವರೆಗೆ ಕೊಟ್ಟಿದ್ದಕ್ಕಿಂತಲೂ ಭೀಕರವಾದ ಹೊಡೆತವನ್ನು ನೀವು ಇನ್ನು ಮುಂದೆ ನಿರೀಕ್ಷಿಸಬಹುದು’ ಎಂದು ಹೇಳಿದೆ. ಅಮೆರಿಕ ಮತ್ತು ಅದರ ಮಿತ್ರರಾಷ್ಟ್ರಗಳ ಪತನವು ಅವಮಾನಕಾರಿಯಾಗಿರುತ್ತದೆ ಮತ್ತು ಅದಕ್ಕೆ ಅವರು ಜೀವನಪೂರ್ತಿ ಪಶ್ಚಾತ್ತಾಪ ಪಡಬೇಕಾಗುತ್ತದೆ ಎಂದು ಸೇನಾ ವಕ್ತಾರರು ಸೇರಿಸಿದ್ದಾರೆ.
ಇರಾನ್ ಸೇನೆ ದುರ್ಬಲವಾಗಿದೆ ಎಂಬ ಟ್ರಂಪ್ ಅವರ ವಾದವನ್ನೂ ಸೇನೆ ತಳ್ಳಿಹಾಕಿದೆ. ‘ನಮ್ಮ ಸೇನಾ ಸಾಮರ್ಥ್ಯದ ಬಗ್ಗೆ ಅಮೆರಿಕಕ್ಕೆ ಯಾವುದೇ ಕಲ್ಪನೆಯಿಲ್ಲ’ ಎಂದು ಇರಾನ್ ವ್ಯಂಗ್ಯವಾಡಿದೆ. ‘ಅಮೆರಿಕ ಗುರಿಯಾಗಿಸಿಕೊಂಡಿರುವ ಸ್ಥಳಗಳು ನಮಗೆ ಅತ್ಯಲ್ಪ. ನಮ್ಮ ಪ್ರಮುಖ ಸೇನಾ ಉತ್ಪಾದನಾ ಕೇಂದ್ರಗಳು ಶತ್ರುಗಳಿಗೆ ಸಿಗದಂತಹ ರಹಸ್ಯ ಸ್ಥಳಗಳಲ್ಲಿವೆ’ ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ. ಪಶ್ಚಿಮ ಏಷ್ಯಾದಲ್ಲಿ ಈಗಾಗಲೇ ಯುದ್ಧದ ಕಾರ್ಮೋಡ ದಟ್ಟವಾಗಿರುವಾಗ, ಇರಾನ್ನ ಈ ಹೊಸ ಘೋಷಣೆಯು ಈ ಭಾಗದಲ್ಲಿ ಮತ್ತಷ್ಟು ಉದ್ವಿಗ್ನತೆಯನ್ನು ಹೆಚ್ಚಿಸಿದೆ.
