‘ಧುರಂಧರ್-2’ ಸಿನಿಮಾ ಬಾಕ್ಸಾಫೀಸ್ನಲ್ಲಿ ಹೊಸ ಇತಿಹಾಸ ಸೃಷ್ಟಿಸಿದೆ. ಎರಡು ಭಾಗಗಳಿಂದ ಒಟ್ಟು 2,700 ಕೋಟಿಗೂ ಹೆಚ್ಚು ಗಳಿಕೆ ಮಾಡುವ ಮೂಲಕ, ಈ ಚಿತ್ರವು ‘ಬಾಹುಬಲಿ’, ‘ಪುಷ್ಪ’, ಮತ್ತು ‘ಕೆಜಿಎಫ್’ ಸರಣಿಗಳ ಒಟ್ಟು ಗಳಿಕೆಯ ದಾಖಲೆಗಳನ್ನು ಮುರಿದುಹಾಕಿದೆ. ಭಾರತದ ಸ್ಪೈ ಏಜೆಂಟ್ ಕಥೆಯುಳ್ಳ ಈ ಸಿನಿಮಾ ದೇಶಾದ್ಯಂತ ದೊಡ್ಡ ಸಂಚಲನ ಮೂಡಿಸಿದೆ.
ಬೆಂಗಳೂರು: ಸಿನಿಮಾಗಳ ಸೀಕ್ವೆಲ್ ಅಥವಾ ಪ್ರೀಕ್ವೆಲ್ ಬಂದ್ರೆ ದೊಡ್ಡ ಹಿಟ್ ಆಗಿದ್ದೇ ಹೆಚ್ಚು. ಮೊದಲ ಭಾಗ ತಕ್ಕ ಮಟ್ಟಿಗೆ ಹಿಟ್ ಆದ್ರೆ ಎರಡನೇ ಪಾರ್ಟ್ ಸೂಪರ್ ಹಿಟ್ ಆಗಿರುತ್ತವೆ. ಇದೀಗ ಎರಡು ಭಾಗದಲ್ಲಿ ಬಂದಿರೋ ಧುರಂಧರ್ ಸಿನಿಮಾ ಹಳೇ ಸಿನಿಮಾಗಳ ದಾಖಲೆಯನ್ನೆಲ್ಲಾ ಚಿಂದಿ ಚಿತ್ರಾನ್ನ ಮಾಡಿದೆ. ಹಾಗಾದ್ರೆ ಧುರಂಧರ್ ಯಾವೆಲ್ಲಾ ಸೀಕ್ವೆಲ್ ಪ್ರೀಕ್ವೆಲ್ ಸಿನಿಮಾಗಳ ರೆಕಾರ್ಡ್ ಮುರಿದಿದೆ ಅಂತ ನೋಡೋಣ ಬನ್ನಿ.
ಮತ್ತಷ್ಟು ಹೆಚ್ಚಾಯ್ತು ಬಾಕ್ಸಾಫೀಸ್ನಲ್ಲಿ ಧುರಂಧರ್-2 ಆರ್ಭಟ!
ಧುರಂಧರ್-2. ಈ ಸಿನಿಮಾ ಬಗ್ಗೆ ಇಡೀ ದೇಶದ ಮೂಲೆ ಮೂಲೆಯಲ್ಲೂ ಮಾತಾಡುತ್ತಿದ್ದಾರೆ. ಪಾಕಿಗಳ ಹುಟ್ಟಡಗಿಸಿದ ಭಾರತದ ಸ್ಪೈ ಏಜೆಂಟ್ ಕತೆಯ ಧುರಂಧರ್ ಬಾಕ್ಸಾಫೀಸ್ನಲ್ಲಿ ನಿಜಕ್ಕೂ ದರ್ಬಾರ್ ಮಾಡ್ತಾ ಇದೆ. ಈ ಸಿನಿಮಾದ ಎರಡು ಪಾರ್ಟ್ಗಳಿಂದ ಬಾಹುಬಲಿ,ಪುಷ್ಪ, ಕೆಜಿಎಫ್ನಂತಹ ದೊಡ್ಡ ಸಿನಿಮಾಗಳ ರೆಕಾರ್ಡ್ಗಳು ಒಡೆದು ಚೂರಾಗಿವೆ..
ಎರಡು ಪಾರ್ಟ್ನಿಂದ ಬಾಹುಬಲಿ ಗಳಿಸಿದ್ದು 2,400 ಕೋಟಿ..!
ಧುರಂಧರ್-2 ಕಲೆಕ್ಷನ್ ನೋಡಿ ಇವತ್ತು ಎಲ್ಲರೂ ಬಾಯ್ ಮೇಲೆ ಬೆರಳಿಟ್ಟುಕೊಳ್ಳುತ್ತಿದ್ದಾರೆ. ಅದರಲ್ಲೂ ಬಾಹುಬಲಿ-ಪುಷ್ಪ, ಕೆಜಿಎಫ್ನಂತಹ ನಿರ್ಮಾಣ ಸಂಸ್ಥೆಗಳು ಹೊಟ್ಟೆ ಕಿವುಚಿಕೊಳ್ಳೋ ಹಾಗಾದ್ತಿದೆ. ಯಾಕಂದ್ರೆ ಎರಡು ಪಾರ್ಟ್ನಲ್ಲಿ ಬಂದು ಸಾವಿರಾರು ಕೋಟಿ ಕಲೆಕ್ಷನ್ ಮಾಡಿದ್ದ ಸಿನಿಮಾಗಳ ರೆಕಾರ್ಡ್ಅನ್ನೆಲ್ಲಾ ಧರಂಧರ್ ಮುರಿಯುತ್ತಿದೆ. ಬಾಹುಬಲಿ ಸಿನಿಮಾ ಎರಡು ಪಾರ್ಟ್ನಲ್ಲಿ ಬಂದಿತ್ತು. ಮೊದಲ ಭಾಗ 600 ಕೋಟಿ ಗಳಿಸಿದ್ರೆ ಎರಡನೇ ಭಾಗ 1,810.60 ಕಲೆಕ್ಷನ್ ಮಾಡಿತ್ತು. ಬಾಹುಬಲಿಯ ಈ ಎರಡೂ ಪಾರ್ಟ್ನಿಂದ ಒಟ್ಟು ಕಲೆಕ್ಷನ್ ಆಗಿದ್ದು 2400 ಕೋಟಿ.
ಇನ್ನೂ ಬಾಹುಬಲಿ ಸೀಕ್ವೆಲ್ನ ನಂತರ ಎರಡನೇ ಸ್ಥಾನದಲ್ಲಿದ್ದಿದ್ದು, ಅಲ್ಲು ಅರ್ಜುನ್ ನಟನೆಯ ಪುಷ್ಪ ಸಿನಿಮಾಗಳು. ಪುಷ್ಪ ಪಾರ್ಟ್-1 ಚಿತ್ರ 390 ಕೋಟಿ ಕಲೆಕ್ಷನ್ ಮಾಡಿದ್ರೆ, ಪುಷ್ಪ ಪಾರ್ಟ್-2 ಸಿನಿಮಾ 1800 ಕೋಟಿ ಕಲೆಕ್ಷನ್ ಮಾಡಿತ್ತು. ಎರಡು ಪಾರ್ಟ್ನ ಪುಷ್ಪ ಒಟ್ಟು ಕಲೆಕ್ಷನ್ 2190 ಕೋಟಿ.
ಕೆಜಿಎಫ್ ರೆಕಾರ್ಡ್ ಕೋಟೆಗೂ ಖನ್ನ ಹಾಕಿದ ಧುರಂದರ್
ಇನ್ನು ನಮ್ಮ ಕನ್ನಡದ ಕೆಜಿಎಫ್ ಸೀರಿಸ್, ಈ ಸಿನಿಮಾ ಮೊದಲ ಭಾಗ ಗಳಿಸಿದ್ದು, 250 ಕೋಟಿ ಅಷ್ಟೆ. ಆದ್ರೆ ಕೆಜಿಎಫ್ ಚಾಪ್ಟರ್2 ಸಿನಿಮಾದಿಂದ ಬಂದಿದ್ದು 1250 ಕೋಟಿ. ಅಲ್ಲಿಗೆ ಎರಡು ಪಾರ್ಟ್ನಿಂದ 1500 ಕೋಟಿ ಕಲೆಕ್ಷನ್ ಮಾಡಿತ್ತು ಯಶ್ ಸಿನಿಮಾ.
ರಡು ಪಾರ್ಟ್ನಿಂದ ಧುರಂಧರ್ ಗಳಿಸಿದ್ದು 2,700 ಕೋಟಿ..!
ಹೌದು, ಇಂದು ಧುರಂಧರ್ ಸಿನಿಮಾ ಬಾಕ್ಸಾಫೀಸ್ ಕಲೆಕ್ಷನ್ ಬಗ್ಗೆ ಇಡೀ ಪ್ರಪಂಚವೇ ಮಾತಾಡುತ್ತಿದೆ. ಈ ಸಿನಿಮಾ ಎರಡು ಪಾರ್ಟ್ನಲ್ಲಿ ಬಂದ ಈ ಸಿನಿಮಾದ ಮೊದಲ ಭಾಗ 1,350 ಕೋಟಿ ಗಳಿಸಿತ್ತು. ಈಗ ಧುರಂಧರ್-2 ಕೇವಲ 12 ದಿನದಲ್ಲಿ 1350 ಕೋಟಿಗೂ ಹೆಚ್ಚು ಕಲೆಕ್ಷನ್ ಮಾಡಿದೆ. ಈ ಎರಡು ಚಾಪ್ಟರ್ನಿಂದ ಸಿಕ್ಕಿದ್ದು ಒಟ್ಟು 2,700 ಕೋಟಿಗೂ ಹೆಚ್ಚು ಹಣ. ಹೀಗಾಗಿ ಧುರುಂಧರ್ ಈ ಹಿಂದೆ ಯಾರೆಲ್ಲಾ ಪಾರ್ಟ್2 ಮಾಡಿ ಬಾಕ್ಸಾಫೀಸ್ ರೆಕಾರ್ಡ್ ಬುಕ್ ಸೇರಿದ್ರೋ ಅವರೆಲ್ಲರ ದಾಖಲೆಗಳು ಕಣ್ಮರೆ ಆಗೋ ಹಾಗೆ ಮಾಡಿದೆ. ಧುರಂಧರ್ ಗಲ್ಲಾಪೆಟ್ಟಿಗೆಯಲ್ಲಿ ಇನ್ನೂ ಮುನ್ನುಗ್ಗುತ್ತಲೇ ಇದೆ.
