ಮೋಹನ್ ಭಾಗವತ್ ಅವರ ಮೂರು ಮಕ್ಕಳ ಹೇಳಿಕೆಗೆ ಓವೈಸಿ ತೀವ್ರವಾಗಿ ಟೀಕಿಸಿದ್ದಾರೆ. ಮುಸ್ಲಿಂ ವಿರೋಧಿ ದ್ವೇಷ ಹರಡಲು ಆರ್ಎಸ್ಎಸ್ ಕಾರಣ ಎಂದು ಆರೋಪಿಸಿದ್ದಾರೆ. ಮೋದಿ ಸರ್ಕಾರ ಯುವಜನರಿಗೆ ಉದ್ಯೋಗ ನೀಡುವಲ್ಲಿ ವಿಫಲವಾಗಿದೆ ಎಂದು ಓವೈಸಿ ಹೇಳಿದ್ದಾರೆ.
ಹೈದರಾಬಾದ್ (ಆ.29): ಆಲ್ ಇಂಡಿಯಾ ಮಜ್ಲಿಸ್-ಎ-ಇತ್ತೆಹಾದುಲ್ ಮುಸ್ಲಿಮೀನ್ (ಎಐಎಂಐಎಂ) ಅಧ್ಯಕ್ಷ ಅಸಾದುದ್ದೀನ್ ಓವೈಸಿ ಶುಕ್ರವಾರ ರಾಷ್ಟ್ರೀಯ ಸ್ವಯಂಸೇವಕ ಸಂಘ (ಆರ್ಎಸ್ಎಸ್) ಮುಖ್ಯಸ್ಥ ಮೋಹನ್ ಭಾಗವತ್ ಅವರ ಪ್ರತಿ ಭಾರತೀಯ ದಂಪತಿ ಮೂರು ಮಕ್ಕಳನ್ನು ಹೊಂದಿರಬೇಕು ಎಂಬ ಅವರ ಹೇಳಿಕೆಯ ವಿರುದ್ಧ ಏಕವಚನದಲ್ಲೇ ವಾಗ್ದಾಳಿ ನಡೆಸಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿಯವರನ್ನು ಗುರಿಯಾಗಿಸಿಕೊಂಡು ಮಾತನಾಡಿದ ಅವರು, ಅವರ ನಾಯಕತ್ವದಲ್ಲಿ ಮುಸ್ಲಿಮರ ವಿರುದ್ಧದ ದ್ವೇಷವು ಸಾಮಾನ್ಯಗೊಳಿಸಲಾಗಿದೆ ಎಂದು ಹೇಳಿದರು. “ಮುಸ್ಲಿಂ ವಿರೋಧಿ ದ್ವೇಷವನ್ನು ಹರಡಲು” ಆರ್ಎಸ್ಎಸ್ ಮತ್ತು ಅದರಿಂದ ಪ್ರಾಯೋಜಿಸಲ್ಪಟ್ಟ ಅಥವಾ ಬೆಂಬಲಿತ ಸಂಘಟನೆಗಳು ಕಾರಣ ಎಂದು ಓವೈಸಿ ಆರೋಪಿಸಿದ್ದಾರೆ.
ಜನರ ಕುಟುಂಬದಲ್ಲಿ ಪ್ರವೇಶಿಸಲು ನೀನ್ಯಾರು?
2011 ರ ಜನಗಣತಿಯನ್ನು ಉಲ್ಲೇಖಿಸಿ AIMIM ನಾಯಕ, ಮುಸ್ಲಿಂ ಜನಸಂಖ್ಯಾ ಬೆಳವಣಿಗೆ ಶೇಕಡಾ 14.23 ಕ್ಕೆ ಇಳಿದಿದೆ, ಹಿಂದೂಗಳು ಸುಮಾರು ಶೇಕಡಾ 80 ರಷ್ಟಿದ್ದಾರೆ ಎಂದು ಹೇಳಿದರು.
“ಮತ್ತು ಈಗ ನೀವು ಹೇಳುತ್ತಿದ್ದೀರಿ, ಸರಿ, ಮೂರು ಮಕ್ಕಳಿಗೆ ಜನ್ಮ ನೀಡಿ. ಜನರ ಕುಟುಂಬ ಜೀವನದಲ್ಲಿ ಪ್ರವೇಶಿಸಲು ನೀನು ಯಾರು? ತಮ್ಮ ಜೀವನದಲ್ಲಿ ತಮ್ಮದೇ ಆದ ವಿಭಿನ್ನ ಆದ್ಯತೆಗಳನ್ನು ಹೊಂದಿರಬಹುದಾದ ಭಾರತೀಯ ಮಹಿಳೆಯರ ಮೇಲೆ ಏಕೆ ಹೊರೆ ಹಾಕಲು ಪ್ರಯತ್ನಿಸುತ್ತಿದ್ದೀರಿ? ಹಾಗಾದರೆ, ಇದು ಆರ್ಎಸ್ಎಸ್ನ ಕ್ಲಾಸಿಕ್ ಬೂಟಾಟಿಕೆ ಆಗಿದೆ ”ಎಂದು ಹೇಳಿದ್ದಾರೆ.
2019ರಲ್ಲಿ ಮೋದಿ ಹೇಳಿದ್ದನ್ನು ನೆನಪಿಸಿದ ಓವೈಸಿ
ಪ್ರತ್ಯೇಕ ಸಂದರ್ಶನವೊಂದರಲ್ಲಿ ಓವೈಸಿ, ಭಾರತದಲ್ಲಿ ಶೇ. 65 ರಷ್ಟು ಜನರು 35 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರು ಎಂದು ಹೇಳಿದ್ದು, ಪ್ರಧಾನಿ ಮೋದಿ ಮತ್ತು ಭಾಗವತ್ ಅವರಿಗೆ ಉದ್ಯೋಗ, ಶಿಕ್ಷಣ ಅಥವಾ ತರಬೇತಿ ನೀಡುವಲ್ಲಿ ಸಂಪೂರ್ಣವಾಗಿ ವಿಫಲರಾಗಿದ್ದಾರೆ ಎಂದು ಆರೋಪಿಸಿದರು.
“ಜನಸಂಖ್ಯೆ ನಿಯಂತ್ರಣ ಇರಬೇಕು ಎಂದು ಪ್ರಧಾನಿ ಮೋದಿ 2019 ರ ಸ್ವಾತಂತ್ರ್ಯ ದಿನಾಚರಣೆಯ ಭಾಷಣದಲ್ಲಿ ಹೇಳಿದ್ದನ್ನು ನಾವು ಮರೆಯಬಾರದು. 2024 ರ ಸಂಸತ್ ಚುನಾವಣೆಯ ಸಂದರ್ಭದಲ್ಲಿ ರಾಜಸ್ಥಾನದಲ್ಲಿ ಅವರು ಹೇಳಿದ್ದನ್ನು ಯಾರೂ ಮರೆಯಬಾರದು, ಅದರಲ್ಲಿ ಅವರು ಹೆಚ್ಚು ಮಕ್ಕಳಿಗೆ ಜನ್ಮ ನೀಡಲು ಮುಸ್ಲಿಮರನ್ನು ದೂಷಣೆ ಮಾಡಿದ್ದುರ. ಈಗ ಇದ್ದಕ್ಕಿಂತೆ ಭಾಗವತ್ ಬಂದು ಹೆಚ್ಚು ಮಕ್ಕಳನ್ನು ಹೊಂದಿ ಎಂದು ಹೇಳುತ್ತಿದ್ದಾರೆ’ ಎಂದು ಓವೈಸಿ ತಿಳಿಸಿದ್ದಾರೆ.
ಜನಸಂಖ್ಯೆಯನ್ನು ನಿಯಂತ್ರಣದಲ್ಲಿಡಲು ಪ್ರತಿಯೊಬ್ಬ ಭಾರತೀಯ ಪೋಷಕರು ಮೂರು ಮಕ್ಕಳನ್ನು ಹೊಂದಬೇಕು ಎಂದು ಆರ್ಎಸ್ಎಸ್ ಮುಖ್ಯಸ್ಥ ಮೋಹನ್ ಭಾಗವತ್ ಗುರುವಾರ ಹೇಳಿದ್ದರು. ಧಾರ್ಮಿಕ ಆಧಾರದ ಮೇಲೆ ಸೇರಿದಂತೆ ಯಾರ ಮೇಲೂ ದಾಳಿ ಮಾಡುವುದರಲ್ಲಿ ಆರ್ಎಸ್ಎಸ್ ನಂಬಿಕೆ ಇಡುವುದಿಲ್ಲ ಎಂದು ಭಾಗವತ್ ಹೇಳಿದರು.
ಮುಸ್ಲಿಮರ ನರಮೇಧಕ್ಕೆ ಕರೆ ನೀಡುತ್ತಿರುವವರು ಯಾರು?
ಇದಕ್ಕೆ ಪ್ರತಿಕ್ರಿಯೆಯಾಗಿ, ಹೈದರಾಬಾದ್ ಲೋಕಸಭಾ ಸಂಸದ ಭಾಗವತ್ ಮುಸ್ಲಿಮರನ್ನು “ಚೋರಿ ಕಾ ಸಮಾನ್ (ಕದ್ದ ಸರಕುಗಳು) ಮತ್ತು ಮೊಘಲ್ ಬಾದ್ಶಾ ಕಿ ಔಲಾದ್ (ಮೊಘಲ್ ಆಡಳಿತಗಾರರ ವಂಶಸ್ಥರು)” ಎಂದು ಕರೆದ ಹಲವಾರು ಉದಾಹರಣೆಗಳನ್ನು ಉಲ್ಲೇಖಿಸಿದರು. “ಮುಸ್ಲಿಮರ ಬಹಿರಂಗ ನರಮೇಧ, ಮಹಿಳೆಯರ ಮೇಲೆ ಬಹಿರಂಗ ಅತ್ಯಾಚಾರಕ್ಕೆ ಕರೆ ನೀಡುತ್ತಿರುವ ಎಲ್ಲಾ ಧರ್ಮ ಸಂಸದ್ಗಳನ್ನು ಯಾರು ನಡೆಸುತ್ತಿದ್ದಾರೆ” ಎಂದು ಅವರು ಪ್ರಶ್ನೆ ಮಾಡಿದ್ದಾರೆ.
